Kapolisan sa Talisay miigmat atol sa “ber month”

CEBU, Philippines - Gipahugtan  sa kapolisan  sa dakbayan  sa Talisay  ang  seguridad  sa katawhan  niiining pagsulod na sa “ber month” aron  nga dili  makaporma ang  mga  badlongon.

Si Superintendent Resty Santos, officer-in-charge sa Talisay City Police Station nagkanayon  nga ang mga “ber month” maoy  tinglihok sa mga badlongon sama sa mga mangingilad, tulisan ug kawatan.

Ang “ber month” gilangkuban  sa mga buwan sa Septiyembre, Oktobre, Nobiyembre ug Disyembre.

Matud ni Santos nga gihingusgan pa gyud nila karon ang police visibility busa may  mga polis   nga  kanunay  nga magpatrolya  sa kadalanan sa siyudad ilabi na sa commercial area  sama sa Tabunok.

Ang mga bangko ug uban pang mga establisemento higpit   nga gi-monitor sa kapolisan aron malikayan ang insidente sa tulis.

Gawas niini ang mga polis kanunay usab   nga nagpahigayon og checkpoints sa kadalanan  ug  ubay-ubay na usab nga mga suspetsadong tulisan  nga nasikop.

Si Santos miawhag  sa katawhan nga dili magkompiyansa ug dili mobiya sa ilang balay nga walay mahibilin nga tawo aron dili mabiktima sa pagpanglungkab.

Ang OIC miawhag usab sa katawhan nga kung mosulod  og  mall, magbantay sa mga mangingilad ug kawatan ug kung adunay mga tawong kadudahan ang mga lihok mo-report gyud dayon ngadto sa polis.

Dugang ni Santos nga nagkinahanglan usab sila og tabang sa katawhan sa pagsumpo sa kriminalidad. (BANAT NEWS)