CEBU, Philippines - Usa ka monumento sa Bayaning si Andres Bonifacio ang pabarugon diha sa Plaza Independencia atol sa iyang ika-150 adlaw nga natawhan atol sa Bonifacio Day.
Hinuon way gastuhon ang siyudad sa Sugbu alang sa katukoran sa lima ka tiil nga monumento sumala pa ni Trifon Sode sa Cultural and Historical Affairs Commission (CHAC) atol sa press briefing sa niaging Biyernes.
Matud ni Sode ang National Historical Commission didto sa kaulohan ang moabag sa pagpatindog sa monumento samtang ang city government moabag lamang pinaagi sa paggama og “ordinance of acceptance.†Ang monumento ibutang duol sa Veterans Marker nga nag-atubang sa National Telecommunication building.
Matud ni Sode itindog ang monumento sa Plaza Independencia gumikan ang maong dapit dunay historical significance. “Dinhi nga area niagi ang mga Spaniards during the Tres de Abril battle human sila mi-surrender as they embarked sa galleon that was shipped to Manila,†matud ni Sode.
Samtang matud ni Bise Mayor Edgardo Labella ang chairman sa CHAC nga dako ang bili sa monumento sa kinabuhi sa mga Sugbuanon gumikan sa gisinati karon nga independensya.
“Ang atong mga katawhan labi na ang atong mga kabatan-onan importante nga di gyod makalimot ug mawala sa ilang panumduman ang bayanihong gibuhat ni Andres Bonifacio to fight for freedom, democracy and against foreign subjugation,†dugang ni Labella. (BANAT NEWS)