CEBU, Philippines - Dako ang pagtuo ni Talisay city Mayor Johnny Delos Reyes nga adunay mga department heads sa city hall sa syudad sa Talisay nga nalambigit sa kontrobersiya nga dul-an sa 6 milyones pesos nga bidding scam sa syudad sa Talisay.
Gitataw sa mayor nga iya gitugotan ang mga opisyal sa Commission on Audit nga mao nay mo-file sa nahisgutang reklamo aron malikayan ang pagduda nga pamolitika ug pagpanggukod sa kanhi administrasyon ang ilang gihimo.
Ang mayor nagtuo nga dako ang komisyon nga nadawat sa pipila ka mga opisyal sa city hall sa 29 ka mga transaksyon sa nahisgutang mga proyekto sa syudad.
Nabantayan usab sa mayor nga ang mga napilding mga bidders sa maong mga proyekto mga “dummy†bidders hinungdan nga usa ra ka supplier maoy modaog (pangalan sa tag-iya ug tindahan gipugngan sa Banat News).
Ang mga miyembro sa Bids and Awards Committee nga gipaubos sa imbestigasyon mao sila si City Engr. Audie Bacasmas, City Asst. Engr. Gamaliel Vicente, Engr. Ariel Araw-araw, Arnel Bacalso, GSO Head Joan Vibar, kanhi City administrator Ritchel Bacaltos ug kanhi BAC chairman Edgar Babunay.
Apan si Engr. Gam Vicente, ang head sa Technical Committee, miklaro nga wala silay kalambigitan sa nahisgutang kontrobersiya kay igo ra man sila mo-verify sa tanang presyo base sa rekomendasyon sa ilang chief mechanics nga si Fortunato Mata.
Dugang pa ni Vicente nga aduna silay proseso nga gisubay aron malikayan ang anomaliya ug dili sila ang mi-canvass sa mga presyo sa mga materyales sa pag-ayo sa mga sakyanan ug heavy equipments apan kun aduna may kasaypanan "in good faith" ra gyud ang ilang nahimo sa Engineering Department. (BANAT NEWS)