CEBU, Philippines - Onse niadtong 70 ka patay’ng lawas nga naugkat gikan sa nalunod nga M/V Saint Thomas Aquinas ang gi-cremate subay sa hangyo sa ilang mga tagtungod.
Kini maoy gibutyag ni Engr. Elbert “Bong†Ebo sa Cosmopolitan Funeral Homes atol sa pagtambong niya sa tigum sa City Hall nga gidumala ni Vice Mayor Edgardo Labella.
Matud ni Ebo nga ang mga kabanay sa maong mga patay dili na gusto nga modala sa mga patay’ng lawas balik sa ilang dapit didto sa Mindanao ug sa ubang parte sa nasud, ilabi na nga dili na kini mailhan sa ilang panagway.
Miabot na karon og 115 ang mga patay nga naugkat gikan sa nalunod nga barko nga natundag human gidam-agan sa M/V Sulpicio Express Siete didto sa Lawis Ledge sa hinapos kaniadtong miaging Agosto.
Sa 115 ka patay’ng lawas nga naugkat, ang 45 nagpabiling wala pa hiilhi. Matud ni Vice Mayor Labella nga dili mahimo nga ilang i-cremate kon himoong abu ang maong mga wala hiilhi nga patay’ng lawas.
Gani giplanohan karon sa mga tinugyanan sa 2GO Shipping, ang tag-iya sa nalunod nga barko ug sa punerarya nga ang maong mga wala pa hiilhi nga patay’ng lawas dunganon sa paglubong sulod sa tagsa-tagsa ka nitso diha sa sam-ang sa Carreta. Matud ni Labella nga ang ilang mga lubnganan mahimong permanente na kay handumanan kini sa pagkalunod sa barko nga nagpaingon unta dinhi sa Sugbo gikan sa Surigao.
Gipasabot ni Labella nga kon ang maong mga patay’ng lawas dili ilubong posible nga makahatag kini og kadaut sa panglawas sa mga tawo. (/EIM) (BANAT NEWS)