Opisyal sa PRO7 gisuspenso

CEBU, Philippines - Usa ka high ranking police official ang gisuspenso og usa ka buwan human mapamatud-i sa Ombudsman of the Visayas nga sad-an sa kasong administratiba nga gipasaka kaniya sa usa ka port security guard adtong 2011.

Si Police Regional Office (PRO)-7 Director, Chief Supt. Danilo Constantino, mikompirmar nga si Deputy Regional Director for Operation, Sr. Supt. Orlando Ualat nasuspenso sukad pa adtong Septiyembre 1.

Si Constantino mibutyag nga ang suspension order nadawat sa Camp Crame apan napahibalo na siya pagka sunod adlaw ug gimanduan nga i-implementar kini dayon.

Apan wala makahibalo si Constantino kung mi-apply og temporary restraining order kay wala man usab kini mangayo og tabang sa PRO-7. “Sa pagkakaalam ko parang nag-apply ng motion for reconsideration si DRDO (Ualat),” he said.

Sa pagkakaron, si Chief of Staff, Sr. Supt. Eduard Carranza temporaryong officer-in-charge sa DRDO.

Si Ualat gipasanginlan nga mikulata kang Ferlito Ompad sa GDS Security Agency diha sa Cebu City port terminal adtong Oktobre 24, 2011. Si Ualat matud pa nga misukmag pag-usab kang Ompad sa opisina sa Firearms Explosives Security Agencies and Guards Supervision (FESAGS) atubangan ni Supt. Rex Derilo pagkasunod adlaw.

Nagkabangi ang duha human wala pasudla ni Ompad si Ualat sa terminal bisan pa man nagpaila kini nga pulis hinungdan nga napugos kini sa paglukat og terminal ticket apan matud pa nga sa pagbalik niini ingong gipakaon ni Ualat ang ticket kang Ompad.

Wala makuntento, gisukmag pa ni Ualat si Ompad sa tiyan ug gikuha ang lisensiya sa armas niini ug gimanduan nga adto kini lukaton sa FESAGS.

Si Ualat mihimakak sa pasangil ug mibutyag nga si Ompad arogante ug walay respeto sa pakighinabi kaniya. (/EIM) (BANAT NEWS)