CEBU, Philippines - Usa ka lawas patay ang napalgan sa mga sakop sa bicycle cops sa dalan MC Briones, barangay Ermita sa dakbayan sa Sugbo sa alas 5:45 sa miaging buntag.
Ang biktima nailhan lamang sa ngalan nga Ben, mga 60-70 anyos, nagsul-ob og blue nga t- shirt ug itom nga purol.
Base sa taho sa homicide section sa Cebu City Police Office nga samtang nag-roving ang mga elemento sa bicycle cops nga gipangulohan ni PO2 Rey Vincent Balane, adunay mitaho kanila labot sa usa ka tawo nga murag gitugnaw.
Busa ila kining gisusi ug ilang nakita ang maong tawo busa nanawag sila sa mga sakop sa Basak Pardo Emergency Response (BPER) aron sa paghiling niini.
Sa paghiabot sa BPER nga gipangulohan ni Kimberly Roselijos , ilang nasuta nga wala nay kinabuhi ang maong tawo.
Nagkadugo ang ilong ug baba niini apan walay nakita nga mga samad sa lawas niya.
Base sa imbistigasyon sa kapolisan nasayran nga ang biktima kanunay makit-an nga matulog sa kilid sa dalan sa maong lugar ug gikataho nga may ubo sa dugay nang panahon.
Ang lawas sa biktima gidala sa Surelife Funeral Services aron ipahigayon ang autopsy niini. (Bryner Diaz/WC)
Malapason sa balaud sa sapa ikiha
Ang dakbayan sa Sugbo mohimo na og lakang sa pagkiha sa tag-iya sa mga building nga anaa gitukod daplin sa kasapaan nga nasulod sa tulo ka metros gikan sa tampi sa sapa.
Gibutyag kini ni kanhi Konsehal Jose Daluz III nga karon maoy gitudlo nga Chairman sa Reduce Danger Zone (ReDZ)-River.
Gisuta nila karon unsa kini nga mga building nga gipanukod daplin sa kasapaan.
Ang building sa Philippine Star/The Freeman nga nahimutang daplin sa gitawag og Parian Creek nga anaa molagbas sa D. Jakosalem gitukod nga gidistansya na’ng daan gikan sa sapa.
Apan daghan sa ubang mga building nga gitukod gipaabot gayud sa tampi sa kasapaan nga nakalapas na sa balaud nga nagdili sa pagtukod og mga straktura sulod sa tres metros gikan sa tampi sa kasapaan.
Matud ni Daluz nga gitahasan nila ang City Legal Office nga mohimo og lakang legal aron mahimoan og koreksyon kining maong kalapasan nga nahimo sa mga tag-iya sa building nga anaa na sa sapa. (BANAT NEWS)