Police checkpoint gilabay’g granada apan mikagar

CEBU, Philippines - Mga polis nga nag-checkpoint diriyot madisgrasya human sila gilabay og granada sa duha ka suspetsadong tulisan niadtong Lunes sa mga alas 11:00 sa gabii diha sa Ramona Village, Barangay San Isidro, dakbayan sa Talisay.

Apan maayo na lang nga ‘dud’ o mikagar ang granada hinungdan nga nasikop sa mga polis ang duha ka suspetsado nga sila si Jake Solis Macarambon, 33 ug Elmer Aballe Macarambon, 30, parehong temporaryong nagpuyo diha sa Ramona Village, habig sa barangay Dumlog, Talisay.

Giingong si Jake lumad nga taga Tudela, Misamis Occidental samtang si Elmer lumad nga taga Kolambogan, Mindanao.

Sa wala pa mahitabo ang insidente si Inspector Rodgene Fudotan uban nila ni PO1 Jude Enemecio, PO1 Erwin Denila, PO1 Chad Mondares ug PO1 Mitchie Albeos nagpahigayon og checkpoint diha sa lugar.

Giingong ang mga suspetsado nanganaog kini sa gisakyan nilang motorsiklo, mihulbot sa ilang mga pusil dayon pusil ngadto sa mga polis apan swerte kay mikagar ang ilang mga pusil.

Tungod niini si Elmer gikatahong miibot og granada dayon gilabog ngadto sa mga polis apan mikagar usab nga wala nay pin. Ang mga suspetsado dali kining gisignit sa nahisgutang mga polis.

Na-recover gikan ni Jake ang usa ka kalibre .38 nga revolver nga dunay unom ka mga buhing bala ug usa ka kalibre .22 magnum derringer nga dunay lima ka buhing mga bala ug ang granadang gilabay niya ngadto sa mga polis gikan ni Elmer.

Si Superintendent Resty Santos, officer-in-charge sa Talisay City Police Station sa pakighinabi niini sa mga tigbalita kagahapon nagkanayon nga gipasusi niya ang mga background sa mga suspetsado ilabi na nga pareho kining taga Mindanao. (BANAT NEWS)