CEBU, Philippines - Sa usa ka joint monitoring sa Department of Environment and Natural Resources (DENR)-7 ug sa National Bureau of Investigation (NBI)-7, nakasakmit og kapin sa 32 ka mga wildlife species nga naglakip sa assorted species nga mga langgam ug usa ka Philippine Macaque gikan sa Barangay Cotcot sa Liloan.
Ang mga na-recover mao ang 10 ka Hanging Parakeet or Kulasisi (Loriculus Philippensis), upat ka Coleto (Sarcops Calvus), tulo ka Tarictic Hornbill (Penelopides Panini), duha ka Green Imperial Pigeon (Ducula Aenea), duha ka Brown Dove or Reddish Cuckoo Dove (Mauropygia Phasianella) ug duha ka Blue Naped Parrot (Tanyghattus Lucionensis) niadtong Biyernes sa alas 2:30 sa hapon.
Lakip sa nasakmit mao ang usa ka Crested Myna (Acridotheres Cristatellus), Philippine Macaque o Macaca Fascicularis, Crested Goshawk(Accipiter Trivirgatos), Philippine Falconet (Microhierax Erythrogenys), Philippine Eagle Owl (Bubo Philippensis), Brahminy Kite (Haliastur Indus), Philippine Hawk Eagle (Spizaetus Philippensis) ug Besra (Accipiter Virgatus).
Sa usa ka memorandum report niadtong Septiyembre 7, 2013 nga gisumitir ngadto ni Montejo gikan ni Protected Area, Wildlife and Coastal Zone and Management Services (PAWCZMS) chief Al Orolfo, nagkanayon nga ang mga species gibutang sa mga hawla ug naka-display sa balay ni Maria Formentera ug sa tugkaran niini ug sa balay ni Aristotle Binabaye.
Sa dihang gi-interrogate na sa team ang duha, gi-deny ni Formentera nga siya ang tag-iya sa maong mga mananap ihalas.
Samtang si Benabaye niangkon nga siya ang tag-iya sa raptors nga naa sa iyang hawanan apan ang wildlife farm permit (WFP) number 2010-70 sa pangalan sa usa ka Paul Nicole Halili sa DENR 7 lamang ang iyang mapakita.
Usa ka administrative seizure proceedings ang himuon sa Protected Areas and Wildlife Division (PAWD) aron mahibaw-an alang sa pagpasaka sa kaso sa korte batok sa mga tag-iya sa mga nadakpan nga mga wildlife species. (BANAT NEWS)