Mama gibukbok og bato sa anak patay

CEBU, Philippines - Usa ka gituohang dunay sakit sa pangisip ang miunay og patay sa iyang inahan pinaagi sa paghapak og bato sa makadaghang higayon sulod sa ilang panimalay sa Barangay Cabungaan, San Francisco isla sa Camotes kagabii.

Si Joebert Otida, 41, matud pa nga pirmi hiktan sa iyang pamilya tungod kay mokalit lang kini sa pagpanapat apan giingong gibuhian sa inahan nga si Veronica Otida, 52.

Si PO2 Marvin Ando, usa sa mga miresponding polis mibutyag nga naglingkod ang biktima dihang kalit nga mikuha og duha ka bato ang suspek dayong hapak sa ulo sa inahan nga miresulta sa kamatayon niini.

Sa pag-abot sa kapulisan sila nagtuo nga gilugos sa suspek ang iyang singko anyos nga anak apan sa ilang pagsulod sa panimalay nagbuy-od na nga walay kinabuhi si Veronica.

Matud pa nga nagkugos pa si Joebert sa iyang usa pa ka tuig nga anak sa dihang gisikop kini. Matud sa kapulisan nga nagsugod sa paglikoy ang suspek dihang miuli kini sa ilaha gikan sa Bohol mga pipila na ka tuig ang milabay.

Mao usab kini ang rason nga gibiyaan siya sa iyang asawa. Nakadesidir ang pamilya ni Joebert sa paghigot kaniya ug buhian lang kini kung mauli-ulian.“Buhian man sad ni nila og tan-aw nila ma-arang-arang na unya ug makabantay sila nga mosuol na sad hiktan na sad og balik,” si Ando nagkanayon.

Anaa karon sa karsel sa San Francisco Police Station ang suspek ug pasakaan kini og kasong parricide karong adlawa.

Dad-on usab sa kapulisan ang mga anak sa suspek ngadto sa Municipal Social Welfare and Development Office alang sa debriefing. (BANAT NEWS)