Sugbuanong Navy Seal

CEBU, Philippines - Miabot kagahapon sa mga alas 3:20 sa hapon sa Benito Ebuen Air Base sa dakbayan sa Lapu-Lapu ang C-130 Hercules nga gisakyan sa patay’ng lawas sa sakop sa Naval Special Operations Group (NavSOG) kinsa namatay sa engkwentro tali sa Moro National Liberation Front (MNLF) niadtong Lunes ngadto sa Zamboanga City.

Base sa report sa Balitang Bisdak nga si Petty Officer 3 Jose Audrey Bañares, 39, lumad nga taga Kansagibo, lungsod sa Tabuelan nakaangkon kini og samad pinusilan sa ulo atol sa engkwentro nga maoy hinungdan sa kamatayon niini samtang ang unom niya ka mga kauban nangaangol sa maong engkwentro.

Usa sa mga igsuon ni Bañares mibutyag nga giingong naka-text pa ang biktima ngadto sa iyang asawa niadtong Domingo sa gabii kabahin sa ilang misyon.

Sumala pa maguwang ni Bañares nga retiradong polis nga si Chief Insp. Arcillano Bañares nakugang sila sa maong balita.  Ang grupo ni Bañares maoy gitahasan sa pagpahigayon og maritime interdiction luwan sila sa duha ka mga speed boats ug nagpahipi sa kabakhawan sa usa sa mga sapa sa Zamboanga City.

Matud pa nga nakadawat og report ang militar bahin sa gikatakdang pag-atake sa MNLF sa Zamboanga agi ngadto sa maong sapa apan giingong sa pag-agi sa napulo ka pumpboats naunhan sila sa mga rebelde nga migamit dayon og flares aron mahayagan ang palibot.

Ang grupo ni Bañares ang nakabawos usab og pagpamusil apan atol sa sinukliay og bala naigo sa ulo si Bañares ug samaran usab ang unom niya ka mga kauban.

Si Bañares ang kamanghuran sa siyam ka managsuon kinsa tulo kanila ang mga sakop sa Navy, usa ang polis ug usa ang sakop sa Philippine Army.

Si Bañares gradwado sa BS Marine Engineering sa usa ka maritime school dinhi sa Cebu City ug misulod sa Philippine Navy sama sa iyang duha ka igsuon. Ang asawa ni Bañares nga si Saturnina uban sa mga kabanay misugat sa lawas niini diha sa airbase diin dunay lima ka minutong “Heroes Welcome” nga gidalit ang Philippine Air Force.

Kagahapon, gipadala sa Police Regional Office-7 ang 130 ka mga sakop sa Regional Public Safety Battalion (RPSB) 7 sa Zamboanga City  isip augmentation force  didto.

Si RPSB chief Clifford Gairanod maoy mangulo kanila sa ilang pagbiya kagahapon pasado alas-4 sa hapon luwan sa C-130 transport plane. (BANAT NEWS)