Forwarding company gitulis

CEBU, Philippines - Gitulis sa duha ka armadong mga lalaki ang LBC  Forwarding company,  Tabok Branch sa dalan North Road sa barangay Tabok, dakbayan sa Mandaue alas 2 pasado ang takna kagahapon sa hapon.

Apan gidemalas ang duha ka suspetsado nga misibat nga nagsakay sa blue nga Honda nga motorsiklo kay nadakpan sila sa mga naggukod kanila.

Ang nadakpan mao sila si Arvin Delfin Mabuyo, 26, ug Glenn Aniel Flores, 29, pulos taga Purok 2, Carmen,  sa Cagayan De Oro City ug temporaryong nagpuyo sa Zone 6 sa barangay Buaya, dakbayan sa Lapulapu. Sila nadakpan sa mga mirespondeng mga polis diha sa sitio Robina sa barangay Tabok sa maong dakbayan. 

Si Senior Inspector Genilo Veraque, hepe sa kapolisan sa Presinto 3 sa Mandaue City Police Office (MCPO) nga nagbase sa barangay Basak nga nahinabi sa Banat News miingon nga nagpakaaron-ingnon nga kustomer ang duha ka tulisan. Ang teller nga si Wenlen Joy Desli, 30, nga taga barangay Paknaan ug ang kauban niining kawani nga si Teresa Reyes, 28, kalit nga gitionan og armas sa duha dungan sa pagdeklarar og tulis.

Matud pa ni Veraque nga wala na makalihok ang mga biktima ug gikuha sa duha ka tulisan ang kuwarta sa sulod sa kaha nga nagkantidad og P5,000 ug nagdali kini sa pagpanggawas.

Ang mga tulisan daling misakay sa blue nga motorsiklo nga gi-parking sa gawas ug mipabulhot paingon sa sudlonong bahin sa Upper Tabok sa maong dakbayan.

Tungod sa daling pagtawag sa mga biktima ngadto sa kapolisan daling natigayon ang hot pursuit operation nga gihimo sa motorcycle cops.

Matud pa nga nakit-an nila ang motorsiklo sa duha nga usa ka blue nga Honda Wave nga gibilin sa dalan lakip na ang duha ka mga helmet niini, tungod kay mitakdo sa deskripsyon, ilang gihikap ang makina niini ug nahibaw-ang init pa kaayo kini timailhang bag-ohay lang gi-parking.

Ang mga habal-habal nga nagbiyahe sa maong lugar maoy mihatag kanila og kasayuran nga ang tag-iya sa motorsiklo nga nag-parking sa maong lugar nakit-an nilang nanglakaw sa unahan. Tungod niini daling giadto sa kapolisan ang gitudlong dapit ug ilang nabantayan ang duha ka lalaking nagbarog-barog ug  mipara  og habal-habal ug nag-abiba pa kini og knapsack.

Dugang pa ni Veraque nga wala na makalihok ang duha ka tulisan dihang gisita ug girekisa ug nakuhaan og kalibre .357 nga armas nga adunay unom ka mga bala ug usa ka Batangas Knife ug nakuha usab nila ang salapi nga P5,000. Gitataw ni Veraque nga ilang gitugyan sa buhatan sa Investigation Detection and Management Bureau (IDMB) ang duha nila ka dinakpan alang sa dugang imbestigasyon. (/EIM)  (BANAT NEWS)