Construction worker gi-tripingan pagluba

CEBU, Philippines - Nalandig sa tambalanan ang usa ka lalaki human kini dunggaba sa usa ka palahubog  didto sa Ranudo Street, sa barangay Cogon, dakbayan  sa Sugbo sa miaging  Domingo  sa gabii.

Ang biktima naila nga si Wilfredo Lago, 29, usa ka construction worker, nga kasamtangang nagpuyo sa maong dapit ug lumad nga taga dakbayan sa Talisay.

Matud sa imbestigasyon sa  Homicide Section  sa Cebu City  Police  Office (CCPO) nga  ang biktima naglakaw sa nahisgutang lugar padulong sa payag-payag nga gipuy-an niini sa construction site.

Unya  kalit  lang  mitumaw  sa iyang  luyo  ang  suspetsado  nga  nailhang  si  “Bambi”, hingkod  ang  edad ug nagpuyo sa maong lugar.

Dayon  kalit  kining  midasmag  sa biktima  ug mihansak  sa  iyang  kutsilyo  sa makadaghang  higayon.

Ang biktima naigo  sa tuong bahin sa lawas ug  sa kamot niini. Midagan ang biktima ug  mipalayo aron makalikay pa sa dugang atake sa maong suspetsado dayon  nagpakitabang  sa   security guard sa construction site nga ilang nahimutangan.

Ang  guwardiya  maoy   midala sa biktima  ngadto  sa  Cebu City Medical Center. Nasuta  sa kapolisan  nga  gi-trippingan  lang  sa suspek  ang  biktima.

Padayon  pang  gipangita  sa kapolisan  ang suspek  kinsa  milayas human  sa maong  hitabo. (/wc) (BANAT NEWS)