CEBU, Philippines - Makaayo sa transportasyon dinhi sa lalawigan sa Sugbo kung dunay mosulod nga dagkong operator og mga bus pasaheroan sanglit sayon na lang sa mga pasahero ang pagsakay.
Apan dako kaayo ang tsansang ma-monopoliya sa mga dagkong operators ang maong sektor.
Kini ang gipadayag ni Nick Villahermosa nga usa sa mga bus operator ug kanhi presidente sa Cebu Provincial Bus Operator Association (CPBOA) nga nahinabi sa Banat Manobela.
Matud pa niya nga nagkadaghan na karon ang nagbiyahe nga mga bus nga sakyanan sa tibuok lalawigan mao nga paspas na karon ang pagbiyahe sa mga pasahero kun itandi sa nangaging panahon.
Gitataw niya nga ang pagdagsang sa daghan nga mga bus nga sakyanan nagpasabot nga nagkadaghan na usab ang misulod sa maong matang sa patigayon dinhi sa Sugbo.
Hinuon si Villahermosa daw gibati usab og kabalaka tungod kay ang mga gagmay nga operators magkakompetensiya na ug basin dili makasugakod, ug kun mahitabo kini ang mga dagko na nga bus operators maoy maghari.
Hinuon si Ahmed Cuizon, direktor sa Land Transportation Franchising and Regulatory Board (LTFRB) Region 7 nga nahinabi sa Banat Manobela mipadayag nga dili makunsiderar nga gagmay nga negosyo ang pag-operate og bus pasaheroan. (BANAT NEWS)