CEBU, Philippines - Padayong mipasidaan ang departamento sa panglawas nga usa ka ilegal ang nahimo sa mga estasyonan sa radyo nga nagsibya sa mga food supplement nga makaayo sa sakit.
Si Regional Director Jaime S. Bernadas nagkanayon nga pakigkitaan niya ang mga kadagkoan sa Kapisanan ng mga Brodkaster sa Pilipinas (KBP) Cebu Chapter kalabot ning maong suliran.
Hinuon wala pa siya mohisgot sa mga estasyonan nga nagpahinumdom og mga food supplement nga moayo sa mga kanser nga sakit sa tawo.
Gibatbat ni Bernadas nga usa ka dakong supak sa balaod ang mga advertisement materials bahin sa food supplement nga makaayo sa mga dagkong balatian sa lawas.
Gawas sa yano nga pagsibya pun-an pa sa mga pamatuod sa mga tawong kunohay kanseron unya mitomar sa food supplement takulahaw lamang nga naayo ang balatian.
Miingon si Bernadas nga usa kini ka dakong lingla sa publiko. Midugang siya nga dili unta kini angay nga isibya sa mga radyo ug uban pang media outlet tungod kay ang mensahe sa balaod tataw kaayo.
Tinuod gimando sa balaod nga kun mopalit og tambal siguroon kadtong tinuod nga tambal nga moayo gyud sa sakit. Gani gidili sa mga doktor sa kagamhanan nga moluwat og resita sa medisina sa pasyente nga way generics nga katugbang sa imported nga medisina sa maong resita.
Kini aron paghatag og higayon sa mga kabus nga makapalit og tambal sa makatarunganon nga presyo nga epektibo batok sa ilang sakit.
Wala pa hinuon siya mosulti kun silotan ba ang mga estasyonan sa radyo nga padayon sa pagsibya sa malinglahong advertisement.
Apan miingon siya nga dugay na silang gidid-an ug hangtud karon nagpadayon gihapon busa angay kining masumpo sumala ni Bernadas.
Gani miingon siya nga kun food supplement, para ra sa sustansya sa lawas.
Sa mga karton sa maong mga food supplement gisuwatan pa og "No therapeutic effect", busa nganong ipasangil man nga moayo sa sakit sa tawo, dugang ni Bernadas.( /WC) (BANAT NEWS)