CEBU, Philippines - Usa ka babaye nga wala pa hiilhi napalgang patay taliwa sa kalibonan sa Sitio Tangke, barangay Tangke-I sa siyudad sa Naga kagahapon sa alas 6:45 sa buntag.
Kini nagsul-ob og karsones nga maong ug fatigue ang blouse, brown complexion, 5 feet ang gitas-on ug dunay bukol sa sentro sa agtang, ug nagpangidaron og 35 ngadto sa 45 anyos.
Si PO1 Bobby Basabe sa Naga City Police Station mibutyag sa Banat News nga usa ka Rosemarie Belleta, 36, nagpuyo sa maong dapit maoy unang nakadiskobri sa biktima nga nagbuy-od taliwa sa kalibonan.
Kini samtang nagtugway si Belleta sa iyang mga binuhi nga kanding ug baka, busa dihang nasuta niya nga wala na kini maginhawa, iya dayong gisumbong sa kapolisan.
Sa pag-respondi sa kapolisan nasuta nila nga patay na ang biktima apan wala sila’y nakita nga mga samad ug bun-og sa lawas gawas lang sa bukol niini sa agtang.
Ang kapolisan mipa- ubos niini sa autopsy sulod sa St. Francis Funeral Parlor sa maong dakbayan
Hinuon gihulagway nga libod-suroy ang maong babaye tungod kay way bisan usa nga molupyo sa maong lugar ang nakaila niini.
Busa nanawagan ang kapolisan sa mga tagtungod nga nawad-an og sakop sa pamilya pagsusi sa biktima basin og ilaha kining kabanay.
Ang kapulisan walay nakita nga timailhan nga gi-among-amongan ang biktima tungod kay kompleto pa kini sa iyang gisul-ob nga senina gawas sa pagkahugaw niini.
Padayon pa nga gi- imbistigar sa kapolisan ang maong hitabo. (WC) (BANAT NEWS)