CEBU, Philippines - Duha ka mga lalaki ang gipamusil, usa kanila ang patay sa nahitabong duha ka insidente sa pagpamusil diha sa barangay Tejero niadtong Sabado sa gabii ug kagahapon sa kaadlawon.
Patay diha-diha dayon ang biktimang si Mateo Macaslang, 29, human gipusil sa tulo ka mga lalaki nga sila si Jessel Lacson alyas Dodong Totong, Janjo Nudalo, ug usa ka ginganlan og Julius.
Ang pagpamusil nahitabo diha sa Upper Sampaguita sa maong barangay alas 4:30 sa kaadlawon.
Si Macaslang nga taga barangay Ilaya sa dakbayan sa Danao mibisita sa balay sa iyang uyoan nga si Manuel Cuizon.
Matud pa sa imbestigasyon naglingkod ang biktima atubangan sa balay sa uyoan dihang kini giduol sa mga suspek ug gitabangan sa pagpusil ang ulo niini nga maoy hinungdan sa hinanali niining kamatayon. Usa ra hinuon ka kabhang sa kalibre .45 pistola ang nakuha sa crime scene. Nasuta sa dugang imbestigasyon nga nianang alas-2 sa kaadlawon giingong gisulong sa mga suspek ang balay sa uyoan ug gipangita ang biktima ug may dalang pusil.
Sa laing insidente sa pagpamusil, usa ka Ricardo Delfin, 33, ang talandugon ang kahimtang human gipusil sa usa ka Michael Villanueva Jr. alyas Je-Je, 20, nagpuyo sulod sa Doña Pepang Cemetery, sa barangay Carreta ning dakbayan.
Ang pagpamusil nahitabo diha sa sitio San Roque, Villagonzallo II sa barangay Tejero sa dakbayan sa Sugbo alas 10:30 ang takna sa miaging gabii.
Ang biktima padulong sa usa ka internetan sa iyang agalon dihang kalit kining gipusil sa suspetsado diha sa tuong aping nga milusot sa tangkugo niini sa walay igo nga rason. (BANAT NEWS)