CEBU, Philippines - Adunay halapad nga rerouting sa mga sakyanan nga ipatuman karong adlawa tungod sa ipahigayong tinuig nga Alay Lakad.
Ang City Traffic Operations Management (CITOM) miingon nga magsugod ang rerouting alas 5 sa kaadlawon ug mahuman dungan sa pagtapos sa programa nga ipahigayon sa SM open parking likod sa Radisson Blu Hotel gikan sa Imus road diin magsugod ang paglakaw.
Hingpit nga sirad-an ang kadalanan sa M.J. Cuenco Avenue ngadto na sa A. Soriano Avenue habig sa may General Maxilom extension, ingon man ang gikan sa A. Soriano Avenue paingon sa Serging Osmeña Boulevard, ingon man sa Kaoshiung street habig sa may A. Soriano ngadto na sa Serging Osmeña Boulevard.
Sa bag-ong dalan nga nailhan usab sa ngalang Imus diin magsugod ang Alay Lakad, ang tuong bahin sa Sikatuna kutob sa General Maxilom Avenue sirad-an sa mga motorista tungod kay didto manukad og lakaw sa dili pa ang programa.
Apektado ang rota sa jeepney nga 62B ug 65B nga paingon sa Ayala gikan sa Pit-os diin inay moliko sa Imus road, molahos kini dayong liko sa Sikatuna st. lahos na sa Gen. Echavez St. ug Gorordo Avenue, liko sa tuo paingon sa Cebu Business Park pinaagi sa Cardinal Rosales Ave., Luzon Avenue, ngadto na sa naandan nga rota.
Ang rotang 13C, samtang paingon sa Ayala pinaagi sa P. Del Rosario St., moliko kini sa wala paingon sa D. Jakosalem St., paingon sa Sikatuna St., General Echavez St., lahos na sa Gorordo Avenue., mosulod sa Cebu Business Park pinaagi sa Cardinal Rosales Ave., agi sa Samar Loop, lahos na sa Mindanao Avenue ngadto na sa ilang naandan nga rota.
Kadtong jeepney nga naggikan sa Carbon paingon sa Mabolo ug Mandaue, moliko sila sa T. Padilla St., Benedicto St., lahos na sa J. C. de Veyra St., liko sa Juan Luna Avenue ngadto na sa naandan nga rota, samtang kadtong gikan sa Mandaue agi sa Urot St., moliko sa F. Batiller St., dayon sa Serging Osmeña Boulevard ngadto na sa naandan nga rota.
Kung gikan sa SM ug North Bus Terminal paingon sa downtown area, adto sila moagi sa F. Batiller St., liko sa Serging Osmeña Boulevard ngadto na sa naandan nga rota.
Samtang ang jeepney nga may rotang 03Q, 04L ug 06H, moagi sa Juan Luna Avenue inig paingon sa SM.
Ang 06H ug 04L mu U-Turn sa J. C. De Veyra St., moliko balik sa Juan Luna Avenue ngadto na sa naandang rota.
Gipasidan-an ang mga drayber ug motorista sa pagsunod sa mga ipamutang mga traffic signages aron dili masalaag ug malangay na hinuon sa ilang mga biyahe. (BANAT NEWS)