CEBU, Philippines - Nakatapok og P200,000 ang benefit fun run alang sa kanhi konsehal ug CITOM Board chairman Sylvan “Jack†Jakosalem nga gipasiugdahan sa Cebu City government kagahapon sa sayo sa buntag.
Ang Cebu City Sports Commission ingon man ang Kapisanan ng mga Brodkaster ng Pilipinas (KBP) misuporta usab sa maong kalihukan nga ang tumong pagtigom ug kwarta aron makatabang sa gasto alang sa padayong pagpatambal ni Jakosalem kinsa nagpaalim gikan sa seryosong sakit.
Gioperahan ang kanhi konsehal sa niaging tuig human siya miduso sa iyang kandidatura isip pagpapili unta pagbalik nga konsehal.
Matud ni CCSC chairperson Edward Hayco, gibana-bana nga miabot sa 2,000 ka mga Sugbuanon ang misalmot sa kalihukan nga pinasikad sa resolution nga giduso ni Konsehal Richie Osmeña ug giaprubahan sa konseho sa milabay’ng semana.
Mapasalamaton si Sharon Jakosalem, kapikas ni Jack sa mainitong suporta sa mga gikan sa city hall diin nagserbisyo ang iyang bana isip konsehal sulod sa siyam ka tuig sa wala pa mahimong CITOM chairman.
“I am very thankful to the city government and the council, especially to Councilor Richie Osmeña for sponsoring the resolution organizing this fun run for my husband. This is my very first run that I completed. Thank you to everybody who came. I know it’s very hard to wake up this early. From the bottom of my heart, thank you very much,†matud niya.
Dugang niya, mitambong usab siya sa usa ka benefit concert sa Outpost Restobar Biyernes sa gabii alang gihapon sa iyang bana nga gihimo sa Y101, ang FM station nga gisilbihan usab ni Jack isip usa ka disc jockey kon DJ.
Gipadaplin una sa mga city officials ang politika ug naghiusa alang sa ilang kanhi kauban.
Gawas ni konsehal Richie Osmeña kinsa maoy mianunsyo sa kantidad sa natigom sa maong fun run, mitambong usab si Mayor Michael Rama, Bise Mayor Edgardo Labella, ingon man mga konsehal nga sila si Margot Osmeña, Nestor Archival, Gerry Carillo, Jun Gabuya, Noel Wenceslao, James Cuenco, ug Mary Ann Delos Santos. (BANAT NEWS)