CEBU, Philippines - Nadayunan sa iyang pagkatog ang usa ka lalaki nga giingong manindahay og ukay-ukay ug giingong mangigoay human gipusil diha sa SRP Plaza pasado ala 1 sa kaadlawon kagahapon. Ang biktima giila lang sa ngalang "Tata" ug molupyo diha sa may Freedom Park ang giulo pagpusil.
Matod pa sa barangay tanod sa barangay Ermita nga si Ponciano Ando nga nakadungog siya og tulo ka sunod-sunod nga buto sa armas hinungdan nga iya kini nga gisusi.
Hangtud nga iyang nasayran nga aduna diay naigo ug namatay sa maong lanog nga buto nga iyang nadunggan.
Dugang pa ni Ando nga nakakuha sila og impormasyon nga mangigoay ang biktima sa dapit ug gidudahang siya maoy responsable sa mga pagpanulis sa maong lugar ug ang kataposang giingong nabiktima mao ang manag-uyab nga nag- date sa dapit. Ang kapolisan sa Homicide Section padayon pa karun nga nagsubay sa posibleng hinungdan sa pagpamusil.
Base sa nasuta sa taga CSI ilang nakita nga adunay duha ka samad pinusilan ang biktima sa ulo nga nakaingon sa iyang hinanaling kamatayon. (BANAT NEWS)