CEBU, Philippines - Ang mga sakop sa Cebu City Council gusto karon nga masayod kun napuslan ba gyud sa mga lumulopyo sa kabukiran ang gibag-o nga Guba Emergency Hospital diha sa Barangay Guba.
Ang mga konsehal sa dakbayan miawhag ni Dr. Fe Cabugao nga maoy gitudlo nga Officer-in-Charge sa Guba Emergency Hospital nga mosumiter og kwentada kun pila ka pasyente ang na-admit sa ospital gikan sa Enero ngadto sa Hunyo 30.
Apil nga gipangayo nga lista sa mga konsehal mao ang imbentaryo sa mga tambal ug medisina nga gibutang sa mao nga ospital aron sutaon kun wala ba mausik lang ang mga tambal. Sa Cebu City Medical Center (CCMC), ang mga konsehal sa dakbayan gusto usab masayod kun giunsa paggamit ang P80 milyones nga tambal nga gigahin sa mao nga ospital.
Ang Guba Emergency Hospital gihatagan usab og budget gikan sa Department of Health (DOH) ug gidugangan pa gyud sa kagamhanan sa dakbayan aron makaserbisyo gyud kini sa katawhan.
Gusto sa mga opisyal sa dakbayan nga ang mga pasyente nga gikan sa lainlaing barangay dili na unta dad-on pa sa Cebu City Medical Center (CCMC) kun dili na kaayo grabe ang ilang kahimtang. (BANAT NEWS)