Turko nga nangilad sa tindahan gikombikto

CEBU, Philippines - Usa ka Turkish national ang gikombikto sa kasong pagpangawat tungod sa giingong pagkawat niini ug sa duha niya ka mga kauban og kwarta sa usa ka convenience store  diha sa North Reclamation Area ning dakbayan sa Sugbu.

Si Regional Trial Court Branch 18 Judge Gilbert Moises misilot sa 32-anyos nga si Murat Altuntas og unom hangtod sa walo ka tuig. Gimandoan usab siyang iuli ang nakawat nga P34,000 ngadto sa tag-iya sa tindahan.

Atol sa pagkahitabo, adunay duha ka mga kaubang Turko si Altuntas nga sila si Yunos Baijan ug Zeyner Surhan sa pagkahitabo sa krimen kinsa daling nakaikyas.

Matud pa sa reklamo, nagpakaaron ingnong kustomer ang tulo ug giduol ang cashier nga si Allona Villa kay magpasensilyo sila sa ilang $100 ngadto sa peso.

Pagkuha ni Villa sa  cashbox giingong giingnan sila ni Surhan nga nangita sila’g tag piso nga dunay silver markings, pinaagi sa diskarte misugot si Villa nga ukayon ang cashbox samtang ang mga kauban ni Altuntas nakigstorya sa laing sales lady.

Matud pa nga giingnan ni Surhan si Villa nga wala sa cashbox ang ilang gipangita ug gisugo niya kini nga mangita’g laing cashbox, apan human ukaya ang ikaduhang cash box nananghid na lang ang tulo nga molakaw kay wala sila’y nakit-ang piso nga dunay silver linings.

Diha na lang nakamatikod si Villa nga nahanaw na ang ilang gilain nga halin nga P34,000 hinungdan nga dali silang mitawag sa kapolisan nga miresulta sa pagkasikop ni Altuntas.

Mitestigo sa kaso ang CCTV operator nga si Mary Ann Cabahug nga nakakita siya nga gikuha ni Surhan ang kwarta samtang nagduko si Villa aron kuhaon ang laing cash box.

Si Judge Moises miingon nga bisan og dili si Altuntas ang aktwal nga nikawat sa kwarta wala kini magpasabot nga wala na siya’y kalambigitan sa krimen.( Annie Fe Perez, UP Intern/EIM)

Napoles ibalhin og priso sa Laguna

Gitugotan sa Makati Regional Trial Court (RTC) ang petisyon sa gitumbok nga mastermind sa pork barrel scam nga si Janet Lim Napoles nga ibalhin og laing prisohan.

Sa duha ka pahinang desisyon, ang hukom sa Makati RTC Branch 150 nga si Judge Elmo Alameda mimando sa kapolisan nga ibalhin si Napoles  sa Fort Sto. Domingo sa Sta. Rosa, Laguna.

“According to [the recommendation], ang facility daw doon ay mas OK. May enough security personnel compared to Makati City Jail na ‘yung ratio of inmates to security personnel is hindi talaga tama,” matud pa sa clerk of court nga si Atty. Jospha Valencia sa report gikan sa ABS-CBNNews.Com.

Ang Philippine National Police-Criminal Investigation and Detection Group (PNP-CIDG) maoy gitahasang mobantay kang Napoles sa pagbalhin kaniya og prisohan.

Ang PNP-CIDG mi-rekomendar  sa korte nga ibalhin sa Fort Sto. Domingo si Napoles, ang maong kampo mao ang training ground sa PNP's Special Action Force.

Bisan ang warden sa Makati City Jail nga si Chief Inspector Fermin Enriquez nabalaka sa seguridad ni Napoles maong iyaha usab nga girekomendar nga ibalhin kini sa mas luwas nga prisohan.

Duna karo’y mga testigo nga giingong mga kanhi mga kawani ni Napoles ang mipadayag nga andam silang mohatag og pamahayag batok sa ilang kanhi agalon.

Gisusi pa karon ang mga pamahayag sa whistleblower nga si Benhur Uy ug ang planong pagbutang sa witness protection program apan tun-an pa ang gibug-aton sa ilang mga testimonya.

Si Marbel Bishop Dimualdo sa mao gihapong report sa ABS-CBNNews.Com,  miawhag kang Napoles nga itug-an na kung si kinsa ang mga nalambigit sa pork barrel.

Samang mga panawagan usab ang gibuhian sa uban pang mga obispo sa simbahan nga panahon na aron ikompisal ni Napoles kung si kinsa ang mga tawo nakabenepisyo sa maong scam ug iuli ang kwartang nawala ngadto sa panudlanan sa katawhan.

Ang abogado ni Napoles nga si Lorna Kapunan nga dili pa kombiktado ang iyang kliyente ug dili makatarunganong hukman kini dayon bahin sa pork barrel scam. Ang kaso ni Napoles nalambigit pa lang karon sa serious illegal detention ni Benhur Uy ug dili ang maong kontrobersya. (Gikan sa Wires/EIM) (BANAT NEWS)