CEBU, Philippines - Gipahimangnoan sa usa ka polis sila si Kong. Gwendolyn Garcia ug anak nga si Atty. Maria Esperanza Christina Garcia Codilla-Frasco labot sa hulga sa ilang kinabuhi.
Ang text message nadawat sa staff ni Garcia kagahapon kinsa ang polis nga wala nagpaila nihangyo nga pahibaw-on sila si Garcia ug Frasco sa maong impormasyon.
Matud pa nga ang plano gipahigayun sa bukirang bahin sa lungsod sa Tuburan nga sakop sa ikatulong distrito ni Garcia.
Kagahapon sayo sa buntag giingong tulo ka gagmay’ng babaye ang nag-estambay ug nagpakaaron-ingnon nga kustomer sa Titay’s Rosquillos sa Liloan nga gipanag-iya sa pamilya sa bana ni Christina nga si Mayor Vincent Franco “Duke†Frasco.
“Ayaw pakompiyansaha Atty. Naay tulo ka babaye gagmay, di katuohan pero amazona daw, ingon amo info,†matud pa sa text message. Ang nagpadala sa text message nagkanayon nga makigtagbo ra siya sa kongresista unya sanglit kaila kaayo sila niini samtang mag-amping una siya sa pagkakaron.
“Basta ingna lang congresswoman Gwen ug Atty. Cristina, di magkompiyansa sa mga tawo nakapalibot nila, kunting ingat,†matud pa. Ang mensahe nagsugyot usab nga ipasusi ang ilang mga bodyguards sanglit lakip sa plano ang pagbayad niini aron lang matuman ang tinguhang pagpatay.
Wala gipa-blotter sa kampo ni Garcia ang maong hulga apan matud pa ni Christina nga siya ug iyang inahan moluwat ra og pamahayag labot niini. “As indicated in the text, the source is a policeman, therefore, the source is a police source. At this point, since the police are aware there is no need for a blotter,†matud pang Christina. (/EIM) (BANAT NEWS)