RAFI midonar og health center sa mga Badjao sa Mambaling
CEBU, Philippines - Ang Ramon Aboitiz Foundation Incorporated (RAFI) mi-turnover og health center ngadto sa mga Badjao sa Sugbo pinaagi sa proyektong Bajau Integrated Area Development Project (BIAD-P).
Sumala pa ni Hanna Aranas, usa sa mga staff sa RAFI nga ang RAFI-BIAD nakig-alayon sa Presentation Sisters of Blessed Virgin Mary (PBVM) ug usab sa mga magtutudlo sa Nano Nagle School sa pagtunol sa maong health center ngadto sa Bajao community sa Sitio Puntod, Alaska Mambaling dakbayan sa Sugbo sa miaging Agosto 13 ning tuiga.
Tumong niini mao ang paghatag sa mga Bajao og libreng health services ug pagdani sa mga medical practitioners ug mga representante gikan sa mga institusyon sa mga health service providers aron mopahigayon og mga libreng medical services.
Gitug-an ni Aranas nga ang maong health center gisugdan pagtukod niadtong Pebrero 1 ning tuiga.
Gitumong kini sa pista ni Saint Brigid mao nga ginganlan og "Saint Brigid" ang maong health center pahinungod sa Irish Saint sa mga masakiton.
Si Dianne Dunggan kinsa usa sa mga team leaders sa mga volunteers uban nila ni Cebu City Health Officer Dr. Stella Ygonia mitunol sa mga yawe sa maong health center ngadto ni Bajau Tribal Chieftain Felecito Asamsa ug ngadto sa mga cluster leaders niini.
“Nalipay mi nga adunay health center dinhi sa among komunidad nga magamit namo kun adunay medical check-up ug trainings bahin sa panglawas," pamahayag ni Rosalita Jamare, Bajau cluster leader ug health center in-charge.
Nakig-alayon usab sa maong proyekto ang Presentation Sisters of Blessed Virgin Mary, University of San Carlos-College of Architecture and Fine Arts, ug ang Cebu City Government.(/EIM) (BANAT NEWS)
- Latest
