CEBU, Philippines - Migahin og P1.4 bilyones nga pundo ang Bureau of Fisheries and Aquatic Resources kon BFAR-7 alang sa rehabilitasyon sa mangrove forest ug ayuda sa pamilya sa mga mananagat nga naapektahan sa oil spill sa lungsod sa Cordova.
Matod ni BFAR-7 Asst. regional Director Allan Poquita dihang nahinabi sa Banat News nga ang maong pundo bahinon katulo.
Diha kuhaon ang pundo alang sa replanting sa mga namatay nga bakhaw sa 500 hektarya nga nadaot sa oil spill ug ang mga mananagat maoy suholan paghimo niini. Matud pa nga P4 kada punoan sa bakhaw ang ibayad sa BFAR.
Samtang hatagan usab gikan sa maong pundo og gasoline subsidy nga tag tulo ka litro ang kada-apektadong mananagat sulod sa tulo ka adlaw kun makabalik na sila sa pagpangisda.Laing gamitan sa maong pundo mao ang pagtabang sa mga asawa sa mga mananagat pinaagi sa livelihood program sama sa pagpamaligya og fish ball, squid ball ug uban pa.
Giangkon ni Poquita nga daghan pa kaayo karong programa ang ilang gihan-ay aron matabangan ang maong mga mananagat tungod kay nagtuo silang molanat pa og usa ka tuig ang epekto sa oil spill sa ilang panginabuhian. (/EIM) (BANAT NEWS)