Tungod sa utang supply sa gasoline gisuspenso

CEBU, Philippines - Nahunong  makadiyot ang suplay sa gasolina sa mga sakyanan sa kagamhanan sa Talisay human  balibari  sa supplier  tungod  sa  kadako na sa utang   niini. Niadtong Martes sa gabii wala  makapagasolina ang  mga  polis  didto  sa Shell Gasoline Station sa barangay Bulacao,  kay gibalibaran  kini  sa tag-iya.

Didto  sila  masayud  nga  wala  pa  makabayad  ang  dakbayan  sa dakong  utang  niini ngadto  sa maong  supplier.  Ang officer-in-charge (OIC) sa Talisay City Police Station nga si Superintendent Resty Santos nagkanayon  nga  apektado  ang ilang operasyon  sa maong  sitwasyon.

Matud ni Santos nga kung wala pa dayon masulbad ang problema sa suplay sa gasolina mapugos sila og kuot sa ilang kaugalingong bulsa  aron  makapagasolina sa ilang mga sakyanan.

Hinuon  kagahapon pasado alas 12:00 sa hapon gibutyag ni Santos nga gipahibawo  siya sa mayor nga puwede na sila nga  makapagasolina tungod kay nagkasabot na siya  ug ang tagdumala sa nahisgutang gasoline station.

Si Edwin Nierves, hepe sa Solid Waste Management sa Talisay mibutyag   nga niadtong Martes sa gabii wala usab tubili ang usa sa garbage truck   kay  gibalibaran  siya.

Si Mayor Johnny De los Reyes nga nahinabi sa Banat News kagahapon nagkanayon  nga pasado alas 12:00 sa hapon kagahapon nasulbad na ang maong problema.

Gibutyag ni De los Reyes nga  kapin  sa P1milyon ang utang sa siyudad sa gasolina sukad niadtong buwan sa Enero niining tuiga  sa milabay’ng administrasyon.

Matud sa mayor nga nagkasabot na sila  ug  ang tagdumala sa gasoline station   busa  nahatagan  sila  og  gasoline.

Hinuon  iyang   gikwestiyon  ang 6-porsyentong patong matag  patubil  sa gasolina sa mga sakyanan sa siyudad.

Dihang  gitug-an  sa tagdumala  nga  tungod  sa kalangayan  mobayad  sa siyudad  sa utang,  maoy  hinungdan  nga  ilang  patungan  og  6  porsento  ang  kantidad  matag  patubil  sa  mga  sakyanan  niini. Hinuon  miingon  ang  mayor  nga  ilang   paningkamutan   nga  dili na malangan ang ilang   pagbayad sa utang aron dili sila makabayad sa patong.

Naglaraw  usab  siya sa   pagpangita  og laing gasoline station nga  maoy  mosuplay og gasolina sa siyudad   sa  ubos  nga presyo ug dili mopatong og dugang   bayranan. (BANAT NEWS)