Amahan nangluod kay gikasab-an naghikog

CEBU, Philippines - Patay na  nga  nakit-an ang  usa  ka  palahubog   nga amahan  nga  nangluod  ug  naghikog  human  kasab-i  sa  iyang  pamilya  didto sa sitio Dunghoy,  barangay  Labangon, lungsod  sa Tabogon  sa  miaging  buntag.

Ang  nagpakamatay  sa  iyang  kaugalingon   naila nga si Felix Nacario, Sr. 52 , minyo ug molupyo sa  maong lugar.

Base sa pasiunang imbestigasyon sa kapolisan sa lungsod sa Tabogon  , si Felix Nacario Jr.,  usa  sa  mga anak  sa  biktima  maoy  nakakita  sa  iyang  amahan  nga  nagbitay  sulod  sa payag  sa  uma  niini.

Mitug-an  si Junior Nacario  sa kapolisan  nga gikasab-an  nila  ang  ilang amahan sayo  sa buntag  sa miaging Sabado gumikan sa iyang pagkapalahubog

Human  niadto  milakaw kini paingon  sa iyang payag ug wala  na  mouli sa ilang balay. Sa  kahingawa  sa  asawa  nga si Esmeralda Nacario iyang gisugo ang iyang anak nga  si Junior nga pangitaon niini ang iyang amahan  kay  wala man kini mahiuli sa ilang balay sulod sa usa ka adlaw. Si Junior  miadto  sa ilang  payag ug  mao  na lay  kahikurat  niini  dihang  nakita  ang  iyang  amahan  nga  patay  na  nga  nagbitay.

Matud sa asawa  nga adunay suicidal tendency ang iyang bana tungod kay matag lalis  nila  mohisgot dayon kini og hikog. Bisan  patay  na  gidala pa  sa  pamilya  ngadto  sa  Sero Verallo Memorial District Hospital sa dakbayan sa Bogo diin didto  kini  ideklarar nga patay na ni Dr. Melben Angel Jochico sa  maong  tambalanan. (BANAT NEWS)