CEBU, Philippines - Mikabat sa P35 mil ang kantidad sa mga butang nga nasakiyo sa wala hiilhing mga kawatan sa duha ka pagpanglungkab ning dakbayan sa Sugbo kagahapon.
Ang mga biktima mao sila si Abita Campo, 44, nga taga sitio Hoyohoy, barangay Busay, ug Honeylen Pacunto, 33, nga taga Negros Oriental apan temporary nga nagpuyo sa Busay Estate Subdivision sa barangay Busay, pulos sa dakbayan sa Sugbo.
Sumala sa kapolisan nga nakasulod ang mga kawatan sa mga balay sa mga biktima pinaagi sa pinugsanay nga paglungkab sa mga pultahan niini.
Ang mga butang nga nakuha gikan sa lawak ni Campo mao ang usa ka Laptop nga mobalor og P10 mil, black phone, P20 mil, ug Torque phone, P3 mil.
Samtang ang nadala sa mga kiriwan gikan sa lawak ni Pacunto mao ang mga alahas nga balor og P1,200.
Ang mga biktima mitaho niini sa kapolisan nga nagtibi samtang padayon gipangita sa mga otoridad sa kapolisan ang mga kawatan.( /WC) (BANAT NEWS)