CEBU, Philippines - Napusilan angol ang usa ka estudyante sa tawo nga mitulis sa iyang cell phone didto sa karaang White Gold sa dalan G. Devera, barangay Carreta dakbayan sa Sugbo kagahapon sa ala 1:20 sa kaadlawon.
Ang biktima naila nga si Queenie Gonato, 15 anyos, tinun-an sa Gothong National High School, nga taga dalan Salvador, barangay Labangon ning dakbayan sa Sugbo.
Kauban niya ang usa ka lalaki nga si Jefferson Marabat, 16 , nga tinun-an sa Mabolo National High School, ug nagpuyo sa Ponce Compound, sa barangay Carreta .
Base sa pasiunang imbestigasyon sa kapolisan nasuta nga naghuwat og jeep ang biktima uban sa iyang amigo dihang may lalaki nga nagsakay og bisikleta nga mihunong sa ilang luyo.
Dayon mition kini sa iyang armas sa biktima ug mideklarar nga tulis.
Ang biktima nga walay kuwarta, mikurog sa kahadlok busa cell phone niini maoy gipangayo sa tulisan.
Apan imbis itunol ngadto sa tulisan, iya kining gilabay, busa gipusil siya sa tulisan.
Human maigo sa walang bahin sa tiyan, gihatud kini sa kauban ngadto sa Cebu City Memorial Medical Center.
Padayon pang gipangita sa kapolisan ang tulisan. (/WC) (BANAT NEWS)