Husay sa nalunod nga barko anhi himoon

CEBU, Philippines -  Anhi sa Sugbo ipahigayun sa Maritime Industry Authority (MARINA) ang husay sa kaso sa panagbangga sa duha ka barko nunot sa hangyo ni Gob. Hilario Davide III. Ang MARINA mitakda unta ugmang adlawa sa husay sa kaso sa nalunod nga MV St. Thomas Aquinas ug ang gikabangga nga Sulpicio Express Siete sa uluhang buhatan.

Apan ang MARINA nakadawat og suwat gikan kang Davide niadtong Agosto 23, 2013 nga naghangyo nga himuon sa Sugbo ang husay.

Gihatag sa MARINA ang gihangyo ni Davide pinaagi sa kamandoan nga giluwatan ni Atty. Gloria Victoria-Bañas, ang Deputy Administrator for Operation sa maong ahensiya nga gipetsahan og Agosto 23, 2013. Ang husay sa kaso ipahigayon alas-10 ugma sa buntag sa rehiyonal nga buhatan sa MARINA 7 sa may North Reclamation Area, dakbayan sa Sugbo.

Nadawat ni Davide ang kopya sa maong kamandoan ni Bañas kagahapon atol sa iyang gipatawag nga command conference sa kalamboan sa maong kaso.

Samtang gipahibawo sa eksperto, Dr. Michael O’Brien sa International Tankers Oil Pollution Federation nga gikuha sa tagdumala sa 2GO nga dili dakung kalamidad ang nahitabong pagbanaw sa lana gikan sa nalunod nga barko sanglit dili kini fuel tanker ug usa lang ka pasaheroan.

Sumala pa niya nga ang mga bakhaw sa kabaybayonan sa lungsod sa Cordova nga gitaptan sa lana dili mangamatay sanglit mabanlas ra kini sa dili madugay. 

Kagahapon gihimo ang ocular inspections sa mga sakop sa Special Board of Marine Inquiry (SBMI) diha sa Lawis Ledge pagsusi kung magkakitaay ba ang mga barko bisan walay gamitong navigational equipment.  (BANAT NEWS)