CEBU, Philippines - Ang kapolisan kanunay’ng andam sa pagtubag sa emerhensiya nga naglambigit sa kinaiyahan matud ni Superintendent Resty Santos, officer-in-charge sa Talisay City Police Station.
Gibutyag ni Santos nga ang kapolisan gibansay pag-ayo bahin sa pagtubag sa emerhensiya sa krimen ug sa kinaiyahan sama sa baha, pagdahili sa yuta ug uban pa.
Hinuon ang kapolisan nagkinahanglan kini og refresher course aron dili makalimot sa ilang mga nakat-onan, matud ni Supt. Santos. Kabahin sa mga ekipo sa pagtubag sa emerhensiya sa kinaiyahan, ang kapolisan sa Talisay nagsalig sa hinabang gikan sa lokal nga kagamhanan.
Apan matud ni Santos nga ang rehiyonal nga buhatan sa kapolisan adunay mga ekipo nga pweding magamit kung kinahanglanon.
Gawas niini aron malikayan ang disgrasya aduna sila’y komunikasyon sa mga barangay.
Gibutyag ni Santos nga kung aduna sila’y madawat nga komunikasyon bahin sa dautang panahon ipasa usab nila kini ngadto sa kabarangayan aron ang mga opisyal sa mga barangay makapangandam ug makapahibawo usab sa mga residente sa ilang lugar.
Sa laing bahin, si Talisay City Public Information Officer Vince Monterde nagkanayon nga ang siyudad motigum sa Local Risk Reduction Council aron hisgutan nila ang bahin sa angayang buhatan kun may mga katalagman.
Matud ni Monterde nga susihon usab ang mga ekipo sa pagtubag sa emerhensiya aron masiguro kini moandar ug magamit gayud. (BANAT NEWS)