Kapolisan blangko sa nagpatay sa Koreano

CEBU, Philippines - Nagpabiling blangko  ang mga sakop sa homicide section sa kapolisan sa Lapulapu City Police Office (LLCPO) sa kamatayon sa magpapatigayon nga Korean national sulod  sa giabangang kuwarto  niini  sa  sitio Looc, barangay Maribago sayo sa buntag sa miaging Sabado.

Si PO1 Jomar Florentino sa homicide section sa kapolisan sa maong dakbayan nga nahinabi sa Banat News  kagahapon miingon nga  nagpadayon pa ang ilang pagkisusi ug sa pag-ila sa mamumuno sa biktima.

Sayo  niini   si Ireneo Villarmia nga usa ka guwardiya  gisikop  sa kapolisan  kay  mao  kuno  kini  gikabangi  sa biktima  n ga  si  Lim Soo Yuen sa miaging Biyernes. Busa    ilang gibuhian   kay  wala  may  lig-ong  saksi  nga  nagtumbok   kaniya   sa maong  krimin  ug gani  miboluntaryo  kini  sa  pagpaubos sa paraffin test.

Matud pa ni PO1 Florentino nga robbery ang nag-unang anggulo nga ilang  gisubay sa kamatayon sa biktima.

Kini  tungod  kay  may  bukas  nga  sobre  nga  gisuwatan  og  P45,000  ang  sulod, nga  diha  tupad  sa patay’ng  lawas  sa biktima.

Gituohan  sa kapolisan  nga  gihabwa sa killer  ang  kuwarta  nga  didto  sa sulod  sa maong  sobre human  mamatay  ang  biktima. Gawas sa salapi nagtuo pa sila nga adunay mga mahalong butang ang  biktima nga lakip sa gisakiyo sa  wala pa hiilhing mga mamumuno.

Si PO1 Florentino miingon nga ang biktima maoy tag-iya sa Carabao Restobar nga nahimutang sa barangay Maribago nga nag-operate sulod na sa tulo ka tuig nga nakalabay.

Gitataw niya nga dako ang ilang pagtuo nga adunay nahitabong commotion sa biktima ug mamumuno niini kay nakatag man ang mga butang sa sulod sa maong lawak nga gipuy-an sa biktima.

 Nagtuo usab sila nga gitabangan sa duha ka mamumuno ang biktima tungod sa mga kabhang sa armas nga ilang napalgan nga iya  sa kalibre. 38 ug 9mm nga pistola. (BANAT NEWS)