CEBU, Philippines - Nasikop kagahapon sa buntag diha sa ilang balay sa barangay Lawaan III, dakbayan sa Talisay ang usa ka suspetsadong tulisan nga giingong gun-for-hire ug mao usab ang suspetsado sa pagpusil kaniadto kang PO3 Arnold Damasco.
Ang nasikop mao si Joshua Dejan Tabera, 24, taga sitio Crasher, barangay Lawaan III, dakbayan sa Talisay kinsa nag-atubang og duha ka kasong murder ug frustrated murder.
Dala sa mga polis sa pagsikop kang Tabera ang warrant of arrest sa iyang duha ka kasong murder nga giluwatan nila ni Regional Trial Court (RTC) Judge Gilbert Moises sa Branch 18 ug Judge Sylva Padiranga sa Branch 16 ug warrant of arrest sa kasong frustrated murder nga giluwatan ni Judge Alexander Acosta sa Branch 9. Si SPO1 Mikie Espina kinsa usa sa misikop kang Tabera mibutyag nga ang suspetsado usa sa mga suspetsado sa pagpusil kang PO3 Arnold Damasco niadtong buwan sa Hulyo sa milabay’ng tuig ug napasakaan kini og kasong frustrated murder.
Si Tabera giingong positibong giila ni Damasco kagahapon sa buntag nga maoy mipusil kaniya. Gawas niini, si Tabera usab ang giingong usa sa mipusil patay sa pag-umangkon ni Senior Superintendent Audie Villacin nga si Rolie Cuevas niadtong buwan sa Agosto sa milabay’ng tuig diha sa barangay Lawaan III uban sa gwardiya sa iyang gitrabahoang tindahan sa hardware nga si Jun Cris Quiroga kinsa naangol usab sa maong pagpamusil. Si Tabera usa usab sa suspetsado sa pagtulis ug pagpusil sa Koreano nga si Jeong Yoo Jin ug sa drayber sa traysikol nga si Diogracias Dumancas niadtong buwan sa Hulyo niining tuiga diha sa sitio Uldog, Ramona Village, barangay San Isidro, Talisay.
Kagahapon sa hapon si April Young, 31, taga barangay San Isidro, Talisay mitumbok kang Tabera nga usa sa mitulis kaniya niadtong Sabado sa kaadlawon dihang nagsakay siya og traysikad paingon nang mopauli gikan sa iyang trabaho.
Laing biktima usab ang mitumbok ni Tabera nga si Crystal Lansang Amoba, 16-anyos, nga usa sa tulo ka mga lalaking mitulis kaniya kagahapon sa alas 12:00 sa tungang gabii diha sa nahisgutang lugar.
Si Espina nagkanayon nga si Tabera ug mga kauban niini mao usab ang suspetsado sa ubang mga nahitabong tulis sa Talisay ug taud-taud na nilang gipanid-an ang maong grupo.
Matud ni Espina nga si Tabera ug ang mga kauban niini giingon mga gun for hire usab. Apan si Tabera nga nahinabi sa Banat News hugtanong mihimakak sa mga pasangil batok kaniya ug nagkanayon kini nga pulos lang tumo-tumo ang mga biktimang mitudlo kaniya. (BANAT NEWS)