DILG misaway sa Juvenile delinquency law

CEBU, Philippines - Ang  kadako sa kadaot   sa  mga  kabtangan  bunga  sa krimin  nga  mugna  sa  mga  batan-on  nga  ubos  sa 18 anyos,  usa sa  mga  angay  sil-ingon  ug  panaminan  sa  mga  magbabalaod.

Kini  ang  gibutyag ni  Regional  Director Ananias Villacorta  sa Department of  Interior and  Local  Government (DILG)7 atol  sa AGIO Forum  nga  gipalanog  sa DYMR.

Matud  pa  ni  Villacorta  nga  angay  sa  mga  magbabalaod  sa nasud  nga  usbon  o amendahan  ang  Juvenile  Delinquency  law  o  balaod  nga  nagdili  pagpriso  sa  mga  batan-on  nga  ubos  sa 18  ang  edad.

“Kun  dili  sila motuo  sa nahitabo  sa palibot  mugna  sa  mga  batan-on  nganong  dili  sila  momugna    og  survey  sa palibot  sa nasud”, matud  ni Villacorta.

Ang  usa  sa nagproblema  niini  mao  ang  mga  kapolisan  ug  ang  Department  of Social  Welfare  and  Development (DSWD),  matud  pa  ni Villacorta.

Kun  madakpan  sa kapolisan  ang  wala  pay  18 anyos,  ila  kining  ihandos  sa  DSWD.

Apan  tungod  kay  ang  DSWD  way budget  alang   sa  pag-atiman  sa  mga  kabataan  nga  kawatan  ug  uban  pang krimin  busa ila na lang kining buhian.

Gani  si  manlalaban Risty Sibay  sa National  Police  Commission (NAPOLCOM)  miingon  nga  may  mga  batan-on  nga  magdala  na  og  birth  certificate  kanunay.

Kun  madakpan sa kapolisan  mokuot  dayon  sa ilang  birth  certificate  ug  ipakita  ngadto  sa   mananakop  pagpamatuod  nga  wala  pa silay  18 anyos  busa    dili  sila angay  ibalhug  sa prisohan.

 Sa laktud  matud  ni Atty.  Sibay  nga  dakong  labad  sa ulo  sa  mga  otoridad  sa kapolisan  ang  mga  batan-on.

Gani  may  mga  tawo  nga  nagtuo  nga  gihimo  kining  balaora  nga  pangdaot  sa kabtangan  tungod  kay  ang  mga tag-iya  o  mabiktima  sa kawat  igo  na lang sa paghilak  kay  dili  man  sila  makapapriso  sa  mga  batan-ong  kawatan.

Miingon  si  Atty.  Sibay  nga  nakamugna  og  dakong  kadaot  sa  kaugmaon  sa  mga  batan-on  ang  maong  balaod  tungod  kay  nagpadasig  kini  kanila nga  magpakadautan  mintras  mga  bata  pa.

Kini  tungod  kay  protektado  sila  sa balaod  nga  motolerar  ra  sa  ilang  mga  binuang,  busa  gikondina  sa mga  otoridad  kining  balaora. (Leizl Mabini  Frasno/WC) 

Espina gusto nga may senador matag distrito

Ang  pagbaton  og  senador  matag  distrito  sama  sa  kongresista  maoy  usa  sa  angay  himoong  balaod   kun usbon  ang  balaod   sa kagamhanan  karon.

Mao  kini  ang  pamahayag  ni  kanhi  gobernador  Rene  Espina  kinsa nagkanayon  nga wala  siya  makauyon  niining  kasamtangang  sistema  sa   nasud.

Ang  kakuwang sa representasyon  sa Sugbo  ngadto  sa senado  maoy  nakaluya  sa mga  proyekto  niini. Miingon  siya  nga  kun tandion  karon  ang  mga  senador  sa Luzon,  Mindanao  ug  Visayas,  naglabi  ang  maong  mga  may  katungdanan  sa senado  sa dapit  sa Luzon.

Gumikan  niini  makaingon  ang  katawhan  nga  tua didto  ang  punting  sa kagamhanan  sa  mga  pagpalambo  sa  mga  proyekto   nga  infrastraktura  tungod  kay  daghan  ang  mga  magbabalaod  sa kongreso  ug sa  senado. 

Si  Espina  kinsa  nahimo  usab  nga  kongresista  ug  senador  human  ma-gobernador  sa lalawigan  sa Sugbo  nagkanayon  nga  sukad    sa iyang  panahon  nakabaton  og  senador  ang  Sugbo sa  panahon  na ni  senador  Serge  Osmeña.

Busa  miingon  siya  nga  gikinahanglan  na  nga usbon  ang  batakang  balaod  ug  usa sa ibalaod  mao  ang  pagmontar  og  dugang  senador  sa nasud.

 Miingon  siya  nga  nagkadaghan  ang  mga  Filipino,  ug  panahon  nga  ang  mga  magbabalaod  modaghan  usab  aron  labing  mabantayan  ang   kaayohan  sa nasud  ug  sa  mga  katawhan  niini.

Si Espina  kinsa  usa  sa  mga  nahimangod  pag-ayo  sa P10  bilyones   nga  pork  barrel  scam sa  mga  magbabalaod   miingon  nga  ang nalambigit  niini  kinahanglang  manubag sa maong  kasal-anan.

Kini  tungod  kay   kun  sil-ingon  ang  daghang  mga  kabus  sa nasud  nga  nag-ilaid  sa pagpuyo  ug  panginabuhi,  makaluluoy  kaayo  kun  ang  mga  adunahan  na  nga  mga  kongresista  ug  senador  mao  pay  mounay  pag-unlod sa ekonomiya  sa Pilipinas.  (BANAT NEWS)