CEBU, Philippines - Padayong gipangita sa kapolisan sa dakbayan sa Talisay ang duha ka mga babaye kinsa giingong maoy kataposang kuyog sa 70-anyos nga American national kinsa gipatay niadtong Huwebes sa kadlawon diha sa iyang giabangang balay sa Phase 3 Santa Catalina, sitio Ilang-ilang, barangay Lagtang, dakbayan sa Talisay.
Gigapos ug gibaatan ang baba ug wala nay sapot si Robert Leroy Turner dihang napalgang patay sud sa iyang lawak.
Si SPO4 Mikie Espina sa pakighinabi sa Banat News kagahapon mibutyag nga gipangita nila karon ang duha ka babayeng kataposang kuyog ni Turner nga nakita diha sa Close Circuit Television (CCTV) cam. Ang nahisgutang mga babaye giingong anha mag-estambayan sa Tabunok ug mga higala ni Turner.
Gibutyag ni Espina nga duna silay na-recover nga sobra sa 10 ka mga hulagway sa babaye gikan sa balay ni Turner diin lakip niini ang hulagway sa mga babayeng nakita diha sa CCTV.
Niadtong Huwebes sa buntag ang mga polis dunay giimbitar nga duha ka mga babaye kansang mga hulagway nalakip sa na-recover nga mga pictures. Gawas sa mga hulagway sa mga babaye ang mga polis naka-recover usab kini og listahan sa schedules sa mga babaye nga pabisitahon ni Turner ngadto sa iyang balay.
Matud ni Espina nga pagpangawat ang usa sa gisentro nilang hinungdan sa insidente tungod kay nawala ang pitaka ug mga alahas sa biktima apan walay timailhang dunay force entry nga nahitabo. (BANAT NEWS)