CEBU, Philippines - Patay nang napalgan kagahapon sa buntag ang usa ka negosyanteng Koreano diha sulod sa giabangan niining kwarto sa sitio Looc barangay Maribago, dakbayan sa Lapu-Lapu.
Ang biktimang si Lim So Yuen, 43, nakaangkon kini og samad pinusilan sa tuong bahin sa iyang tiyan ug tuong bukton.
Si Yuen tag-iya kini sa Carabao Restobar nga nahimutang sa barangay Maribago ug nag-operate kini pipila na ka tuig ang nakalabay.
Ang mga residente sa lugar misumbong ngadto sa kapolisan nga mga alas 2:00 sa kaadlawon kagahapon nakadungog sila og lima ka buto sa pusil. Uban sa mga residente nagtuo nga ang gwardiya nga nadestino diha sa duol nga beach resort maoy nagpabuto sa iyang service firearm.
Ang kapolisan sa Lapu-Lapu ug Special Weapons and Tactics personnel wala dayon makasulod diha sa lugar nga nahitaboan tungod kay sirado ang gate niini hinungdan nga nangayo sila og panabang sa cook sa restaurant ni Yuen aron maablihan ang gate.
Dihang nakasulod na ang mga polis naabtan nila sa kwarto ang biktima nga nagbuy-od nga wala nay kinabuhi.
Nabantayan sa mga polis ang nagkaguliyang nga mga butang sulod sa kwarto sa biktima ug ilang gituohan nga sa wala pa mahitabo ang insidente dunay nahitabong komosyon tali sa biktima ug mamumuno.
Gituohan sa mga polis nga ang mamumuno misaka kini diha sa koral ug misulod ngadto sa kwarto sa biktima.
Na-recover sa mga polis gikan sa lugar nga nahitaboan ang duha ka kabhang sa bala sa kalibre .38 nga revolver ug 9mm nga pistola.
Na-recover usab sa mga polis ang usa ka .38 kalibre nga revolver nga dunay usa ka buhing bala nga giingong iyaha sa biktima, usa ka brown envelop nga dunay markang Carabao ug P46,000 nga koleksiyon sa biktima sa dakbayan sa Mandaue apan wala na ang cash.
Ang P6,000 nga kita sa resto bar niadtong Biyernes ang giingong nawagtang usab. Ang mga polis misikop kang Ireneo Villarmia, usa ka bantay alang sa imbestigasyon. Giingong si Villarmia ug ang biktima nagkabangi kini niadtong Biyernes.
Si Villarmia mihimakak sa pasangil batok kaniya apan gipaubos siya sa paraffin test pagsuta kung wala ba kini makapabuto og pusil. (Brenda D. Batuto ug Jose P. Sollano sa The Freeman/EIM) (BANAT NEWS)