CEBU, Philippines - Kusog nga hanging habagat ug kusog nga balod ang hinungdan sa pagkasangad sa usa ka yati sa kadagatan sa barangay Pungtod sa lungsod sa Oslob sa lalawigan sa Sugbo sa miaging adlaw sa alas -10 ang takna sa buntag.
Matud pa sa taho sa Cebu Provincial Police Office (CCPO) nga ang maong yati gipanag-iya sa usa ka resort nga nahimutang sa barangay Tubod sa lungsod sa San Juan sa lalawigan sa Siquijor.
Luwan sa maong yati ang tulo ka tawo nga sila si Paulo Surmeon, 25, nga maoy kapitan sa maong yati, master diver nga si Emeliano Sumagang, 50, ug ang 33-anyos tripulante niini nga si Jaboy Sumagang ang tulo pulos lumulupyo sa Tubod, San Juan, Siquijor.
Sumala pa sa pakisusi sa kapolisan sa Oslob Police Station nga gipangulohan ni SPO4 Aurelio Lozano nga milawig gikan sa barangay Tan-awan sa Oslob ang maong yati padulong sa Siquijor apan nakasugat kini’g dakong mga balod inubanan sa hangin nga habagat.
Gumikan sa kakusog sa mga balod ug sa hangin naanod kini ug nasangad sa barangay Pungtod sa Oslob. Dali usab nga mirespondi ang kapolisan inubanan sa mga sakop sa Bantay Dagat sa maong lungsod aron sa pagluwas sa mga tripulante sa maong yati. Naa na sa luwas nga kahimtang ang kapitan ug ang tripulante samtang ang yati kasamtangang naa nahimutang karon sa barangay Balitang lungsod sa Boljoon. (BANAT NEWS)