CEBU, Philippines - Tungod sa gugma ug pagkadaghang kontra maoy gitutukan nga posibleng hinungdan sa pagpamusil sa usa ka traysikol drayber nga kritikal karun ang kahimtang sud sa tambalanan.
Ang biktima nga si Antonio Manigos, 46, giingong gipusil diha sa Sityo Looc Sur, sa Poblacion sa lungsod sa Asturias niadtong Biyernes sa alas 11:00 ang takna sa gabii.
Ang biktima nga buwag sa asawa nagpuyo sa barangay Nangka sa lungsod sa Asturias. Samtang ang namusil niini wala pa matino sa kapolisan kung si kinsa.
Matud ni PO2 Ariel Taguiam sa Asturias Police Station dihang nahinabi sa Banat News namasahero ang biktima sa iyang traysikol dihang kalit kini nga dunay mi-overtake nga motorsiklong may duha ka lalaking sakay.
Matud pa nga ang angkas sa motorsiklong walay plate number kalit nga mipusil sa biktima dihang nakatupad na kini sa traysikol hinungdan sa mga samad pinusilan ni Manigos diha sa iyang ulo ug bukobuko.
Human sa hitabo daling mipasutoy palayo ang mga gunmen samtang ang biktima nakahigayun pa padaplin sa iyang gemaniho nga traysikol ug nangayo tabang.
Gidali pagdala sa mga estambay ang biktima sa Balamban District Hospital apan tungod sa seryuso nga kahimtang gipabalhin kini og tambalanan sa dakbayan sa Sugbo alang sa tukmang medikasyon. (BANAT NEWS)