CEBU, Philippines - Gikonsiderar nga usa ka ‘maritime disaster prone area’ ang Lawis Ledge, ang dapit diin magkabangga ang M/V St. Thomas de Aquiñas ug ang MV Sulpicio Express Siyete nga mikalas og 32 ka mga tawo.
Kini base sa data nga nakuha gikan sa Philippine Coast Guard website. Sumala pa ni Cordova Mayor Adelino Sitoy ang Lawis Ledge usa ka gamay kaayong agianan nga kabatohan ang isi’g ka kilid ug dunay kusog kaayo nga sulog.
"Until new seaports are built in the south and north, anytime naa gyud madisgrasya nga mga barko nga mangagi nganha. Ang passage nganha narrow kaayo unya kusog ang current. Mao nga og dili suhito ang kapitan sa barko nga moagi nganha, mada gyud sa current," matud pang Sitoy kansang lungsod kabahin usab sa Lawis Ledge tabok sa bukana sa Mactan Channel. Misugyot kaniadto si Sitoy, sa paghimo og bag-ong pantalan diha sa iyang lungsod ingon man sa Consolacion, Liloan, Talisay o ba kaha sa Minglanilla.
Ang pagtukod niini mao ray nakitang paagi ni Sitoy nga maluag ang panaghuot sa mga barko sa Cebu City port area.
"All vessels going to Cebu has to pass through the Mactan Channel which is getting narrower because of several reclamation projects. If we have ports from other area, then vessels have a wider choice asa sila mudunggo," sumala pang Sitoy kinsa midugang nga ang maong agianan adunay gitas-ong 50 ka kilometro ug may gilawmong lapas sa 120 feet.
Niadtong bulan sa Pebrero 23 ning tuiga nasaghid ang M/V Trans-Asia 9. Ang M/V Island Fast Craft I sa Island Express Shipping nalunod usab sa Lawis Ledge niadtong Agosto 2011 nga miresulta sa kamatayon sa tulo ka tawo. (BANAT NEWS)