Mga pangalan sa makagawas nga ex-convicts ipahibalo sa brgy.

CEBU, Philippines - Buot sa mga opisyal sa barangay nga hatagan sila kanunay og lista sa mga piniriso nga makagawas na gikan sa bilanggoan aron magiyahan sila kun unsay tabang nga ilang mahimo kanila.

Mao kini ang awhag ni Konsehal Michael Ralota, presidente sa Association of Barangay Councils (ABC), kang kansang sugyot nga gipaagi sa resolusyon giuyonan sa iyang mga kauban sa Cebu City Council. Matud ni Ralota nga kinahanglan nga ang kadagkoan sa Cebu City Jail nga gipangulohan ni Supt. Johnson Calub mohatag kanila og listahan sa mga bag-ong na-release nga binilanggo.

Gusto ni Ralota nga unta ang listahan kompleto sa mga address kon pinuy-anan sa mga ex-convict.

Napanglantawan ni Ralota nga ang maong mga “bag-ong laya” angayan nga matabangan sanglit sagad sa mga tawo dili mopasulod og trabaho niining mga ex-convict.

Matud ni Ralota nga tinguha niya nga ang maong mga ex-convict makatungha bisan og mga vocational skills aron magamit nila kini nga panginabuhian ug dili na sila mobalik sa dautang binuhatan.

Sagad sa mga ex-convict nga nabalik sa prisohan mipasabot nga napugos sila paghimo og mga krimen human makagawas sa bilanggoan kay walay modawat kanila og trabaho. (/EIM) (BANAT NEWS)