CEBU, Philippines - Gitinguha sa Department of Agriculture (DA) ang pagpataas sa produksyon sa mais sa probinsya sa Sugbo ug lakip na sa ubang mga dapit nga kasagaran nga tuboan sa maong mga tanom aron makatabang sa pagsiguro sa hustong suplay sa pagkaon atol sa panahon sa lean months o dili ting-ani.
Kini maoy gihatagan og gibug-aton ni DA Secretary Proceso J. Alcala atol sa iyang pagbisita sa buhatan sa DA 7 sa miaging Huwebes sa pagturn-over og mga proyekto ngadto sa mga representante sa nagkalain-laing mag-uuma sa probinsya sa Sugbo. Si Alcala usab ang usa sa nahimong mamumulong atol sa pagbukas sa ika 60 nga PHILSUTECH convention sa syudad sa Sugbo ning bag-ohay lang. Sumala ni Alcala nga ang Pilipinas hingpit na nga adunay igong pundo sa pagkaon ug mipasidungog sa mga mag-uumang Filipino kalabot sa ilang kahimtang sa pagkakaron.
Dugang pa ni Alcala nga human sa 40 ka tuig, ang nasud mibaligya na karon og mga fancy ug organic nga humay ngadto sa United Arab Emirates ug nga nakadawat na usab og mga nagbalik-balik nga order.
Gipasalig ni Alcala nga ang DA magpadayon sa ilang paningkamot sa pagpares sa mga mag-uuma nga makaprodyus og mais ug sa tumuranan nga merkado niini.
Nakadawat sa kinatibuk-ang P14.4 milyones nga kantidad sa agricultural nga proyekto nga gitunol ni Alcala ang Asturias- Balamban Communal Irrigators Association ug Arpile-Buanoy Irrigators Service Association sa Balamban sa Sugbo. Gihatag kanila ang hand tractor nga nagkantidad og P128,500 ang matag usa.
Bulak (Dalaguete) Irrigators’ Association , nakadawat usab og floating tiller nga nagkantidad og P87,900; Barili Rice Farmers Irrigators Association - rice thresher nga balor og P106,700. Ang mga lungsod sa Asturias, Poro, Pilar, San Francisco and Tudela – nakadawat ang matag usa og tagsa ka unit nga four-wheel drive tractors nga nagkantidad og P2,400,000.
Samtang nakadawat usab og plastic drums ug knapsack sprayers nga nagkantidad og P1, 609,000 ang syudad sa Sugbo;
Duha ka concrete small farm reservoirs nga nagkantidad og P150,000 ang nadawat sa Argao.
Cultivator/tiller nga nagkantidad og P250,000 ang nadawat sa LGU Dalaguete samtang lima ka kabaw nga nagkantidad og P175,000 ang gihatag usab ngadto sa CAMPINSA MANIPES Multipurpose Cooperative .
Gawas sa mga representanteng mga mag-uuma, ang maong kalihokan gisalmotan usab sa mga local government executives nga naglangkob nila ni Mayor Teresito Mariñas sa lungsod sa Barili, Mayor Alan Adlawan sa Lungsod sa Asturias, Mayor Wilson Wenceslao sa lungsod sa Santander ug Mayor Erwin Yu sa lungsod sa Tudela.
Gihatagan usab og gibug-aton sa maong hamubong kalihokan ang pagsayaw sa National Year of Rice (NYR) dance nga gipangulohan sa mga local staff sa DA 7. (/WC) (BANAT NEWS)