LPA gipanid-an kung mahimong bagyo

CEBU, Philippines - Gipahibalo sa PAGASA nga duna silay gisundan karong low pressure area nga posibleng mapormang bagyo  sa sidlakang bahin sa Northern Luzon, ang maong weather disturbance nasigpatan samtang ang hanging habagat naghulga usab nga magdala og mga pag-ulan sa ubang bahin sa Luzon sugod kagahapon hangtud karong adlawa.

Wala pa gani mahuwasi ug makabarog ang mga nabiktima sa bagyong Labuyo sa milabay’ng semana sa Northern Luzon nasigpatan na usab kining maong dautang panahon.

Ang LPA gibanabanang nahimutang 1,200 km sa sidlakang bahin sa Northern Luzon sa labing uwahing weather update alas-4 sa hapon kagahapon.

Matud pa sa PAGASA dunay bagang panganod nga naporma sa maong dapit  hinuon dako ang ilang pagtuo nga dili gyud kini mapormang bagyo, apan kung sa higayon nga mahitabo kini ug mosulod sa Philippine area of responsibility panganlan kining bagyong "Maring."

Mipasidaan ang PAGASA sa mga gagmay’ng mananagat nga dili mokumpyansa ug likayan ang paglawig sa mga lugar nga dunay kusog nga huros sa hangin tungod kay magdala kini og dagkong mga bawod. (Gikan sa Wires/EIM) (BANAT NEWS)