CEBU, Philippines - Laing 271 ka container van sa bugas nga nasakmit sa Customs Port of Cebu ang gitakdang isubasta sa umaabot nga Agosto 22, 2013.
Matud pa ni Cebu Customs District Collector Edward dela Cuesta nga sugod karong adlawa hangtod ugma ang higayon sa mga mosalmot sa bidding nga makasil-ing sa mga sinakong bugas nga isubasta.
Gani lakip sa susihon ni dela Cuesta kung wala ba mabasa ang mga bugas nga anaa karon sa CIP.
Kini tungod kay may mga sinakong bugas sa ubang mga container van nga nangabasa na ug dili na ikabaligya.
Karong Agosto 22, gitakda ang laing hugna sa bidding sa mga bugas nga isubasta sa publiko.
Nanghinaut si dela Cuesta nga mas modaghan pa ang mosalmot sa subasta ug ilang ipakita ang transparency niini atol sa maong bidding. Ang tanan mokabat sa 707 ka mga container vans na lang ang nahibilin sa 1,169 container vans sa bugas nga nasakmit sa mga tinugyanan sa Custom sa Sugbo nga isubasta sa dili pa matapos kining tuiga.
Sa milabay’ng Aug. 8 nga maoy unang hugna sa pagsubasta, mikita ang Customs Cebu og P211 milyones kapin gikan sa 312 ka container vans sa maong mga sinakong bugas.
Mikabat usab sa 25 ka mga negosyante sa bugas ang misalmot sa maong subasta. (BANAT NEWS)