Laing special session gitakda sa konseho

CEBU, Philippines - Ang mga konsehal sa dakbayan sa Sugbo mitakda og executive session karong Agosto 20 ug giimbitar gihapon nila ang mga sakop sa Local Finance Committee aron sila masayud sa kahimtang sa panudlanan sa siyudad.

Kini samtang wala g’yuy bisan usa sa mga opisyal sa Cebu City executive department nga mitambong sa public hearing nga gipahigayon sa City Council kagahapon aron unta magtuki kun aduna pa ba’y kwarta ang dakbayan.

Matud ni Konsehal Gerardo Carillo nga siya maoy mangunay sa pagpasaka’g kaso batok sa mga opisyal nga ilang imbitahon apan dili motunga kay maisip man nga wala sila magtuman sa ilang katungdanan.

Si Carillo miingon nga ang dili pagsanong sa imbitasyon sa City Council maisip nga kalapasan sa mga lagda nga gilatid sa Code of Ethical Standards for Public Officials and Employees ubos sa Republic Act 6713.

Apan si Mayor Michael Rama namahayag nga wala siya matandog sa hulga ni Carillo nga mao kini ang mangunay pagpasaka og kaso sa iyang mga department heads.

“Hulga-hulga siya nga mokiha? Basin siya ang angayang ikiha,” matud sa mayor. Nahibaw-an nga si Carillo nakontrobersiya kay gipasanginlan nga mihapak og bato sa ulo sa usa ka batan-on.

Ang pamahayag ni Rama nagpasabot nga dili gihapon siya mosugot nga moatubang ang iyang mga sakop sa Local Finance Commitee, apil na ang city accountant, ug nga magtuki lang sa migawas sa Annual Budget Report.

 Ang mga konsehal gusto g’yud unta nga mosukit-sukit sa city treasurer kun daghan pa ba og kwarta ang dakbayan pagka- karon ug kun pila na ang nakolekta sa kinatibuk-an nga “estimated revenue collections.”         

Sa pagsugod sa public hearing kagahapon adunay mga accountants gikan sa City Accounting department nga maminaw unta sa pagtuki sa isyu apan naglumba pagpanggawas dihang nasayud nga gidid-an sila ni Rama sa pagtambong.         

Gipasabot ni Mayor Rama nga dili siya gusto nga motambong sa public hearing kay ang city treasurer dili pa iyang pinili.

Gibutyag ni Rama nga gitawgan na siya sa usa ka opisyal sa Manila nga gipirmahan na ang appointment sa bag-ong treasurer sa dakbayan apan wala maila kun kinsa.  (BANAT NEWS)