Tag-iya sa karenderya sa Pahina-Central gym gikasohan

CEBU, Philippines - Gipasakaan na kagahapon og kasong kriminal ang banay’ng Inso human sa pagdumili sa pagtangtang sa ilang karenderya sa sulod sa sports complex sa barangay Pahina Central bisan pa man sa clearing order gikan sa Cebu City Hall.

Si Raquel Bohol-Arce, hepe sa Prevention Restoration Order Beautification Enhancement (PROBE) mi-served sa order ngadto kang Editha Inso, tag-iya sa usa ka karenderya sulod sa complex nga tapad sa Cebu City Medical Center apan nagmagahi kini ug nanukol sa demolition team.

Si SPO2 Rene Sultan sa Carbon Police Station mipasaka og alarm scandal slander, grave coercion ug resistance and disobedience to persons of authority batok ni  Editha, sa iyang bana nga si Benigno Inso, sa iyang igsoon nga si Eva Mabini ug helper nila nga si Fe Mariboto.

Sa inquest proceeding, ang tulo nagdumili pag-avail sa preliminary investigation ug mipadayag nga ilang atubangon  ang kaso sa korte.

Sa interbyu kang Editha, mipadayag kini nga andam silang mopahawa sa dapit kung ang barangay captain sa Pahina maoy momando kanila kay mao kini ang naghatag kanila og pagtugot nga magbutang og karenderya sa gym.

Atol sa pag-serve sa kamandoan, nagmagahi sila Inso ug nanglupad ang mga botelya ug kaldero ngadto sa mga sakop sa PROBE. (BANAT NEWS)