CEBU, Philippines - Tulo ka lalaki, usa niini bayot ang nasikop atol sa gihimong buybust operation sa kapolisan sa Investigation and Detective Management Branch (IDMB) ug City Intelligence Branch (CIB) sa managlahi nga lugar ug oras sa miaging gabii.
Ang mga nasikop mao ang bayot nga si Rodel Silverio, 37, molupyo sa C. Padilla St.; Junevec Pepito, 37; ug Nichol Dioso,26, pulos molupyo sa sitio Rotunda, barangay Banilad samtang padayon pang gipangita ang giingong bigtime drug pusher nga si Eugene Legaspi.
Pasado alas -8 sa miaging gabii, gipahigayon ang buybust operation diha sa dalan C. Padilla sa mga sakop sa IDMB kini human adunay impormanteng midangop sa ilang buhatan kalabot sa dayag lang kaayo nga pagpamaligya sa usa ka bayot nga naila nga si Silverio sa ilang dapit.
Si Silverio napalitan og balor 200 pesos nga kantidad sa shabu poseur buyer ug human mitunol niini sa naulahi dali kining gikuptan ug giposasan.
Nakuha gikan kaniya ang laing duha ka medium packs sa gituohang shabu nga mobalor og P18 mil ang kada usa ug laing 42 ka gagmay’ng putos sa gituohang shabu nga mobalor og tag P250 kada usa niini.
Matud pa sa hepe sa IDMB Chief Insp. Aileen Recla nga nianang pagkabuntag adunay tawo nga personal nga miadto sa ilang buhatan aron ipahibalo ang giingong “lantaran†lang kaayo nga pagpamaligya og ginadiling drugas ni Silverio ug ang panimalay niini gihimo nang drug den.
Sa nakuhang impormasyon ni Recla nga kasagaran sa mga kliyenti ni Silverio mga tinun-an ug mga taxi drivers ingon man mga drayber sa habal-habal.
Si Silverio sa iyang bahin, mipadayag usab nga naatlan lang gyud siya sa kapolisan nga namaligya, matud pa niya gikapoy na siya sa pagpanarbaho sa parlor kay gamay ra og kita unya bahinan pa niya ang iyang agalon niini. Matud niya nga sa drugas dako siya og komisyon.
Samtang pasado alas dose sa tungang gabii, ang mga sakop usab sa CIB mipahigayon usab og buybust operation diha sa sitio Rotunda sa barangay Banilad batok ni Eugene Legaspi apan nakaikyas kini atol sa maong operation.
Apan atol sa buybust operation sa panimalay nga gipanag-iya ni Junevec Pepito, 37, nakuhaan kini og dose ka mga gagmay’ng pakete sa gituohang shabu samtang si Nichol Dioso nakuhaan usab og mga drug paraphernalia.
Si Dioso dihang nahinabi mipadayag nga igo lang gipabantay sa iyang anak ug wala siya’y labot sa pagpamaligya.
Samtang si Pepito mipadayag usab nga dili iya ang mga nakuhang drugas, apan wala gihimakak niini nga tiggamitan usab siya og ginadiling drugas.
Matod pa ni Chief Inspector Gomercendo Mandawe nga ilang gipangita karun ang kauban sa duha nga si Legaspi kinsa nalakip sa ilang drug watchlist. (BANAT NEWS)