3 ka tawo giluba pulos angol

CEBU, Philippines - Tulo  ka  tawo  ang  samdan  human  sila  dunggaba  sa ilang  kontra  sa managlahing  dapit  sa Metro  Cebu  kagahapon.

Ang  mga  biktima  mao  sila  si  Ramil  Daitol,  hingkod,  nga taga sitio Sangi,  barangay  Pajo, dakbayan  sa  Lapulapu, Arque Maquilang, 22, nga  taga  SYC  barangay  Day-as ug Cesar  Villamor, 38,  taga  sitio  Lawis-Alaska,  barangay  Mambaling,  pulos  sa dakbayan  sa  Sugbo.

Nasayran  sa   Banat  News   nga  si  Daitol  giluba sa maguwang  niini  nga  si  Edgardo  Daitol, 45, minyo  nga  taga  Sangi  ra  gihapon.

Sumala  ni  PO2 John Jocotan  sa Lapulapu City  Police  Station  nga  sa wala  pa  lubaa  si Daitol,  nag-inom  kini   ug  ang suspek  sa tindahan  nga  ilang  silingan  pagkahuman  nila  og  panihapon.

Apan  dihang  nangalasbag  na,  nagkalalis  ang  managsoon  hangtud  nga  miinit  kini  pag-ayo.

Ang suspetsado  nga  nahutdan  na  og  katarungan,  milanit  sa gunting  ug  giduslak  ang  tiyan  sa biktima.

Nagkabuang  ang  ilang  pamilya  sa pagtabang  sa  biktima  ug  gihatud  dayon  ngadto  sa Lapulapu City  Hospital  apan  gibalhin usab  dayon  ngadto sa Vicente  Sotto  Memorial  Medical  Center  sa dakbayan  sa Sugbo.

Ang suspetsado  nga  nasikop  dayon  sa kapolisan  anaa  na  karon  sa prisohan.

Samtang  si  Maquilang  nakig-estorya  sa  iyang  amigo  nga  nailhan  lang  sa ngalan  nga  si  Mac-mac  didto  sa basketball  court  sa SYC.

Unya  miduol  ang  suspetsado nga  nailhan  sa  ngalang  si  Junior  Menardo Patingog,  hingkod, nga  taga  barangay  Kamagayan,  dakbayan  sa Sugbo.

Walay  daghang  estorya  giluba  ang  bukobuko  sa biktima.

Human  kini  malukapa, gibiyaan    sa suspek kinsa  milayas  ug gipangita pa  karon  sa kapolisan.

Samtang  gihatud  dayon  ngadto  sa Cebu City  Medical  Center  ang  biktima kansang  dugo  padayong  nag-agas  agi  sa buko-buko  nga maoy  gitaroyan  sa kutsilyo.

Samtang  si Villamor  gikan  nga  nakig-inom  sa iyang  amigo  ug  dihang  pauli  na  kini  sa ilang  balay  giatangan  siya  ni Roldan  Nodalo,  hingkod,  nga  silingan  ra  usab  niya.

Gipataopan  sa kutsilyo  sa suspek  ang  buko-buko  sa biktima  ug  sa pagkahagba  niini  sa yuta  gibiyaan  dayong  layas  sa suspek.

Anaa  pa  karon  sa CCMC  ang  biktima  samtang  gipangita pa  sa kapolisan  ang  suspetsado. (Bong Soriano, Romeo T. Limpangog  ug Sibyl Pacaña, USJR Masscom Intern/WC) (BANAT NEWS)