CEBU, Philippines - Dili motuo si Gob. Hilario Davide III nga may kalabutan si Presidente Benigno Aquino III sa pagpahunong sa pagpadakop kang kanhi Kong. Clavel Asas-Martinez ug anak nga si kanhi Bogo City mayor Celestino “Tining†Martinez III, ug laing lima pa ka kauban.Matud pa ni Davide nga kahibawo siya sa Presidente nga ang balaud gyud ang ipatigbabaw.
Si Davide ug ang mga Martinez sa dakbayan sa Bogo parehong kaalyado sa Liberal Party (LP) nga gipangulohan ni Aquino.Adunay mga katahap nga labanan ni Aquino ug sa LP ang mga Martinez aron makalingkawas sa pagkabilanggo. Ang Sandiganbayan Second Division miluwat og resolusyon niadtong Miyerkules nga gipirmahan nilang Justice Teresita Diaz-Baldos ug Associate Justices Napoleon Inoturan ug Oscar Herrera Jr.
Ang resolusyon nga gipakanaog niadtong Hulyo 31, 2013 nagsuspenso sa pagpatuman sa warrant of arrest nunot sa Omnibus Motions to Dismiss nga gisang-at nilang Clavel, Tining, ug konsehal sa dakbayan sa Bogo nga sila si Rhett Minguez ug Crecencio Verdida.
Ang korte nitugot sa mosyon nga ihiklin una ang pagpatuman sa warrant of arrest nga giduso niadtong Hulyo 29, 2013 sa mga Martinezes ug laing mga akusado nga sila si Minguez, Verdida, Rhodariza Kilantang, Julieta Quiño ug Maria Cielo Martinez, laing anak ni Clavel.Ang mga akusado namatud-an sad-an sa giingong ilegal nga paggasto sa pundo gikan sa Priority Development Assistance Fund ni Clavel niadtong 2003.
Sa wala pa nigawas ang resolusyon, ang National Bureau of Investigation (NBI) 7 misuway unta pagdakop nilang Clavel, Tining ug Minguez apan napakyas sanglit wala sila sa ilang mga pinuy-anan.
Si NBI Regional Director Antonio Pagatpat miingon nga ilang sundon ang kamandoan sa Sandiganbayan. Kagahapon gihatud sa assisting lawyer sa mga Martinezes ang kopya sa order gikan sa Sandiganbayan Second Division nga si Atty. Inocencio dela Cerna didto sa buhatan sa NBI. (/EIM) (BANAT NEWS)