CEBU, Philippines - Patay ang usa ka 65-anyos nga lalaki nga giingong dunay deperensiya sa iyang pangisip human kini nakahikap sa interlink fence sa Felix Enterprises nga dunay live wire diha sa Sityo Bahada barangay Poblacion sa lungsod sa San Remegio sa miaging Martes sa buntag.
Ang patay nang nadangat sa tambalanan dinhi sa dakbayan sa Sugbo mao si Reynaldo Manares, 65, nagpuyo sa Sityo Tagasa Poblacion ug dunay deperensiya sa pangisip. Matud ni PO3 Felipe Gamsael Mandal sa San Remegio Police Station nga nahinabi sa Banat News, si Manares miabot sa tindahan sa usa ka Nida Rosillosa ug nihikap sa interlink fence ug kalit nga nakuryentihan. Ang magtutudlo nga si Roman Fernandez nga naagi sa lugar paingon sa eskwelahan maoy nakadiskobri ni Manares nga nagtapot sa interlink fence maong dali niya kining gitabang. Apan lakip siya ug ang ubang mitabang apil sa nakoryentihan hinungdan nga ilang gibiyaan ug nilahos sila sa buhatan sa kapulisan aron pag-report sa hitabu. Daling miresponde ang mga polis ug didto gitabang si Manares ug gikarga paingon lahos sa tambalanan dinhi sa dakbayan apan gideklarar kining patay na.
Gipaabot pa sa kapolisan kung mopasaka og kaso ang banay sa namatay ug sa mga tawong nakuryentihan batok sa tag-iya sa Felix Enterprise tungod sa peligrong bunga sa ilang pagbutang og kuryente sa ilang kural. (BANAT NEWS)