Buwan sa Agosto daghan og holiday

CEBU, Philippines - Mga kawani sa pribado ug publikong buhatan sa dakbayan sa Mandaue ug mga estudyante ug mga magtutudlo sa mga pribado ug pampublikong tunghaan sa siyudad walay trabaho ug walay klase sa pagsaulog sa ika-444 nga founding anniversary sa siyudad sugod niadtong Agosto 6, 2013.

Gawas niini gisundan usab kini og holiday karong adlawa (Biyernes) nga maoy pagtapos sa Ramadan ug gideklara nga walay klase ug trabaho.

Dugang nga mga adlaw nga gideklarar nga holiday mao ang Agosto 21 nga maoy kasumaran sa kamatayon ni anhing Senador Benigno Aquino nga amahan sa presidente. Samtang sa Agosto 26 laing adlaw na usab nga walay trabaho tungod sa pagsaulog sa National Heroes Day.

Ang bulan sa Agosto alang sa mga Mandauehanon ilang tapuson nga walay trabaho sanglit sa petsa 30 sa maong bulan mao man usab ang kasaulogan sa Charter Day Anniversary sa siyudad.

Si Presidente Aquino pinaagi ni executive secretary Paquito Ochoa Jr. ubos sa proclamation 628  sa maong adlaw sa kasaulogan sa Charter Day  anniversary walay klase ug walay  trabaho sa maong dakbayan. (BANAT NEWS)