CEBU, Philippines - Natusaktusak sa bala ang tibuok lawas ug ulo sa usa ka 73- anyos nga lola nga gibanhigan samtang paingon unta kini sa iyang umahan didto sa bukirang bahin sa barangay Cabungahan sa siyudad sa Danao kagahapon sa alas 7:00 sa buntag.
Ang biktima nga patay diha-diha mao si Amancia Lata Tariao,73, nagpuyo sa Sityo Kawayan, barangay Manlayag ug nanag-iya og dakung umahan sa maong barangay.
Giila ang suspek nga mao si Julito Montres, 42, nagpuyo sa maong lugar.
Matod ni PO1 Genic Gabutan sa Danao City Police Station dihang nahinabi sa Banat News, naglakaw ang biktima paingon sa iyang umahan apan pag-agi niini sa pinuy-anan sa suspek giingong kalit lang gibabagan ug gipusil ang biktima.
Ang suspek daling nakasibat human sa hitabo ug wala na maabti sa kapulisan sa pagrespondi sa alarma. (/EIM) (BANAT NEWS)